Erlan Qoshanov Ózbekstannyń Olıı Májilis Senatynyń tóraǵasymen kezdesti
ASTANA. KAZINFORM — Májilis spıkeri Erlan Qoshanov Astanaǵa resmı saparmen kelgen Ózbekstan Respýblıkasy Olıı Májilisi Senatynyń tóraǵasy Tanzıla Narbaevamen kezdesý ótkizdi, dep habarlaıdy Májilistiń baspasóz qyzmeti.
Taraptar parlamentaralyq yqpaldastyqty arttyrý máselesin talqylap, ekijaqty qarym-qatynastyń ózekti jaıttary boıynsha pikir almasty.
Qazaqstan men Ózbekstan arasyndaǵy parlamentaralyq dıalog qarqyndy qanat jaıyp keledi. Tek bıyldyń ózinde eki el Parlamentteriniń basshylary túrli alańdarda birneshe márte kezdesý ótkizdi.
Joǵary deńgeıdegi kelissózder búgin Ózbekstan Respýblıkasy Olıı Májilisi Senaty tóraǵasynyń Qazaqstanǵa resmı sapary aıasynda jalǵasyn tapty.
Kezdesýde Erlan Qoshanov ózbek halqyn kele jatqan Táýelsizdik kúnimen quttyqtap, baýyrlas aǵaıynǵa baq-bereke tiledi.
— Búginde elderimiz arasyndaǵy kún tártibiniń mazmuny arta túsýde. Yntymaqtastyǵymyz strategııalyq seriktestik pen odaqtastyq rýhynda qarqyndy damyp keledi. Bul — árıne, bizdiń Prezıdentterimizdiń eren eńbeginiń nátıjesi, — dedi E.Qoshanov.
Strategııalyq áriptestik Parlament deńgeıinde de serpindi jalǵasyp jatyr. Parlamentaralyq baılanys — eki el basshylarynyń kelisimderin iske asyratyn mańyzdy tetiktiń biri. Sondyqtan depýtattar buǵan erekshe mán berip, tyǵyz baılanysta jumys atqaryp jatyr.
— Kóshbasshylarymyzdyń kezdesýleriniń qarqyny men nátıjeligi bizdiń parlamentaralyq baılanysymyzdyń sıpatyn aıqyndaıdy. Shavhat Mırzıeevtiń Qazaqstanǵa jasaǵan 2021 jylǵy sapary barysynda Prezıdentterimiz barlyq ýaǵdalastyqtyń oryndalýyn parlamentter baqylaýy kerek degen ortaq pikirge keldi. Sóıtip, Parlamentaralyq yntymaqtastyq keńesin qurý týraly sheshim qabyldandy. Búgingi tańda Keńes tıimdi jumys atqarýda. Biz Tashkentte jáne Almatyda keńestiń eki otyrysyn ótkizdik. Prezıdentterimizdiń arasyndaǵy barlyq kelisim parlamentshilerdiń baqylaýynda. Jalpy, depýtattarymyzdyń ár kezdesýi ekijaqty qarym-qatynasty nyǵaıtýǵa erekshe qarqyn berýde, — dedi E.Qoshanov.
Óz kezeginde, Tanzıla Narbaeva qonaqjaılyq tanytqany úshin Qazaqstan tarapyna zor alǵysyn aıtyp, ekijaqty parlamentaralyq baılanys nyǵaıa beretinine senim bildirdi.
— Kóptegen másele boıynsha bizdiń kózqarasymyz uqsas. Jáne únemi bir-birimizdi qoldap kelemiz. Prezıdentterimiz de birdeı baǵyt ustanady. Ol — azamattarymyzdyń jaıly ómir súrýi úshin jaǵdaı jasaý, beıbitshilik, qaýipsizdik pen turaqtylyqty qamtamasyz etý. Kóshbasshylarymyz eki el arasyndaǵy taýar aınalymyn 2030 jylǵa qaraı 10 mlrd dollarǵa jetkizý jóninde aýqymdy mindet qoıdy. Oǵan barlyq múmkindik bar. Bizdiń maqsatymyz — Prezıdentterimizdiń kelisimderin iske asyrý úshin zańnamalyq negiz qalyptastyrý, — dedi Tanzıla Narbaeva.
Buǵan deıin habarlanǵandaı, Prezıdent Ózbekstan Olıı Májilisi Senatynyń tóraǵasy Tanzıla Narbaevany qabyldady.