Májilis spıkeri: Ádiletti Qazaqstan – ańyz emes
Elimizde júrgizilip jatqan reformalarǵa negizdelgen «Ádiletti Qazaqstan» degenimiz ne? Májilis tóraǵasy Erlan Qoshanov «Kazahstanskaıa pravda» gazetine Prezıdent Qasym-Jomart Toqaevtyń ulyqtaý rásiminiń bir jyldyǵyna oraı bergen suhbatynda oılarymen bólisti, dep jazdy Kazinform.
– Ádiletti Qazaqstan – qııalı maqsat emes. Prezıdent bul týraly aıtqanda, bolashaqtyń beınesin kóregendikpen kórsetip berdi. Ol – azamattar turǵylyqty nemese shyqqan jerine qaramastan, sapaly áleýmettik ınfraqurylymǵa birdeı qol jetkize alatyn el. Tártip pen zań ústemdigi saltanat quratyn memleket. Adamnyń kedeı nemese baı bolýyna qaramastan, teń múmkindikterdi qamtamasyz etetin, barlyq azamattyń ósýi men ózin-ózi damytýyna qajetti jaǵdaı jasalǵan jer, – dedi Erlan Qoshanov.
Májilis tóraǵasy memleket óz azamattarynyń laıyqty ómir súrýi men adal eńbek etýi úshin jaǵdaı jasaýy qajettigin, biraq bul resýrstardy bólý degendi bildirmeıtinine basa nazar aýdardy.
– Ár eldiń resýrsy shekteýli. Biraq bárine teń jaǵdaı jasaý – bizdiń basty ári tikeleı maqsatymyz. Balalardyń barlyq jerde joǵary sapaly bilim alýy, medıtsınanyń tehnologııalyq turǵyda damyǵan jáne bárine qoljetimdi bolýy, kásipkerler bir quqyqtyq alańda bolýy jáne artyq paıda tabý maqsatymen eshkimge zańnamalyq nemese ákimshilik artyqshylyqtar berilmeýi úshin birqatar saladaǵy teńsizdikti joıýymyz kerek. Mine, osyndaı qoǵamdy ádil dep ataýǵa bolady, – deıdi tóraǵa.
Májilis spıkeri bıyldan bastap jemqorlardyń aqshasyna mektep salý osyndaı ádildiktiń úlgisi dep atady. Onyń pikirinshe, bul áleýmettik ádildikti qalpyna keltirý týraly Prezıdent tujyrymdamasyn júzege asyrýǵa birden-bir septigin tıgizedi.
– Óıtkeni bıýdjetti jymqyrǵandar balalarymyz ben keler urpaqtan urlap otyr. Bizdiń mindetimiz – ony urpaqqa qaıtarý. Jańa býyn básekege qabiletti, bilikti bolyp ósýi úshin barlyǵyn jasaımyz. Búginde bul maqsatqa 150 mlrd teńge túsip, el aýmaǵynda 70 mekteptiń qurylysy júrip jatyr. Depýtattar osy mektepterdiń zamanaýı, jaıly, bilim berýge jáne jańa bilim berý tehnologııalaryn qoldanýǵa qabiletti bolýyn qadaǵalaıdy, – dedi E.Qoshanov.
Sondaı-aq osyndaı mysal retinde Májilis spıkeri Prezıdenttiń «Ulttyq qor balalarǵa» baǵdarlamasyn, jylý elektr stantsııalary men ınjenerlik jelilerdi jańǵyrtý, jaıly mektepter, aýrýhanalar men joldar salýdy atap ótti.
– Búginde Úkimet bıýdjet pen ınvestıtsııany josparlaýdaǵy olqylyqtardyń ornyn toltyrý úshin kóp jumys atqaryp jatyr. Jyldar boıy tıisti kóńil bólinbegen máselelerdi qolǵa aldyq. Jáne bul ádemi megajobalar men záýlim ǵımarattar emes, adamdardyń kúndelikti ál-aýqatyna tikeleı baılanysty ómirlik mańyzdy nysandar, – delingen suhbatta.
Erlan Qoshanov aýyl turǵyndarynyń tabysyn arttyrýǵa baǵyttalǵan «Aýyl amanaty» baǵdarlamasy da ádilettiń úlgisi ekenin aıtty.
– 2025 jylǵa deıin Prezıdenttiń saılaýaldy baǵdarlamasyna sáıkes biz qazaqstandyqtardy 100 paıyz aýyz sýmen qamtamasyz etýimiz kerek. Aýyldyq jerlerde 700 medıtsınalyq mekeme salý josparlandy. Al bul – atqarylyp jatqan isterdiń bir bóligi ǵana, – dedi Májilis tóraǵasy.
