Májilis Sıngapýrmen aradaǵy ınvestıtsııalarǵa qatysty zańdy qabyldady
ASTANA. KAZINFORM – Búgin Májilistiń jalpy otyrysynda «Qazaqstan men Sıngapýr arasyndaǵy kórsetiletin qyzmetter saýdasy jáne ınvestıtsııalar týraly kelisimdi ratıfıkatsııalaý týraly» Zańy qabyldandy.
Zań 2023 jylǵy 22 mamyrda Astanada jasalǵan kelisimdi ratıfıkatsııalaýǵa baǵyttalǵan.
«Sıngapýr kórsetiletin qyzmetterde damýdyń ozyq tájirıbesine ıe, buǵan onyń ekonomıkalyq kórsetkishteri men ınnovatsııalyq jetistikteri dálel bola alady. Qazaqstan men Sıngapýr arasyndaǵy taýar aınalymy 2023 jyly 1,8 mlrd AQSh dollaryn qurady, onyń ishinde qazaqstandyq eksport 94 paıyzǵa jetti. Kelisim aıasynda qazaqstandyq bıznes úshin Sıngapýrdyń kórsetiletin qyzmetter naryǵyna qatysýyn keńeıtip, jaqsarttyq. Odan bólek, Kelisim ınvestıtsııalardy júzege asyrý úshin neǵurlym qolaıly jaǵdaılardy eskerip otyr, sondaı-aq halyqaralyq praktıkaǵa sáıkes ınvestorlardy qorǵaýdyń joǵary deńgeıin qamtamasyz etedi», - dedi Saýda jáne ıntegratsııa mınıstri Arman Shaqqalıev.
Onyń aıtýynsha, Qazaqstanǵa Sıngapýrdyń salǵan tikeleı ınvestıtsııalarynyń kólemi keıingi 10 jylda 1,7 mlrd AQSh dollaryn quraǵan. 2023 jyly Sıngapýrdan Qazaqstanǵa tikeleı ınvestıtsııalardyń jalpy aǵyny 457 mln AQSh dollaryna jetti.
«Jalpy, kórsetiletin kyzmetter salasy álemdik ekonomıkanyń asa iri jáne perspektıvaly sektory sanalady. Álemdik jalpy ishki ónimdegi kórsetiletin qyzmetter úlesi damyǵan elderde shamamen 75% jáne damýshy elderde 50 paıyzdy quraıdy. Qazaqstannyń jalpy ishki ónim qurylymynda kórsetiletin qyzmetterdiń úlesi 50 paıyzdan asady. Osyǵan baılanysty qyzmetter salasyn ilgeriletý jáne damytý úshin jaǵdaı jasaý maqsatynda kórsetiletin qyzmetter men ınvestıtsııalar týraly kelisimder qoldanylady. Sıngapýr – qyzmetter saýdasy men ınnovatsııalar salasynda eleýli tájirıbesi bar seriktes. Mundaı seriktespen jasalǵan kelisim – úlken jetistik. Bul qujat tájirıbe almasýda, elderimiz arasyndaǵy saýda-ekonomıkalyq jáne ınvestıtsııalyq yntymaqtastyqty damytýda aıtarlyqtaı serpin berip, tabysty bolady dep sanaımyz», - dedi mınıstr.
