Májilis sybaılas jemqorlyqqa qarsy is-qımyl jónindegi qujatty qabyldady
ASTANA. KAZINFORM – Búgin Májilistiń jalpy otyrysynda «Táýelsiz Memleketter Dostastyǵyna qatysýshy memleketterdiń sybaılas jemqorlyqqa qarsy is-qımyldaǵy yntymaqtastyǵy týraly kelisimdi ratıfıkatsııalaý týraly» zańy qabyldandy.
Kelisimniń maqsaty - sybaılas jemqorlyqqa qarsy is-qımyl salasyndaǵy ulttyq kúsh-jiger men yntymaqtastyqtyń tıimdiligin arttyrý.
Bul qujatqa Astanada 2022 jyly 14 qazanda Armenııa, Belarýs, Ózbekstan, Qyrǵyzstan, Reseı, Tájikstan jáne Qazaqstan memleketteriniń basshylary qol qoıǵan.
- Kelisim yntymaqtastyqty tıisti baǵyttar boıynsha keńeıtýdi kózdeıdi. Bul turǵyda sybaılas jemqorlyq qylmystar týraly ister boıynsha járdem kórsetý, birlesken jedel-izdestirý is-sharalaryn júrgizý, sybaılas jemqorlyq qylmystar jasaǵan adamdardy ustaý jáne berý, arnaıy aqparattyq júıelerdi qurý jáne paıdalaný. Sybaılas jemqorlyqtan túsken kiristerdi tabý jáne qaıtarýdy júzege asyrýdaǵy ózara is-qımyl yntymaqtastyqtyń mańyzdy baǵyty sanalady, - dedi Sybaılas jemqorlyqqa qarsy is-qımyl agenttigi tóraǵasynyń birinshi orynbasary Ulan Sarqulov.
Jalpy, kelisim aıasynda basqa da yntymaqtastyq sharalary eskerilgen.
Budan basqa, sybaılas jemqorlyq qylmystarǵa qarsy is-qımyl salasynda úılestirilgen nemese kelisilgen jedel-izdestirý, jedel-profılaktıkalyq is-sharalar men arnaýly operatsııalar júrgizý, sondaı-aq ózge de is-sharalar qarastyrylǵan.
Eske salsaq, Qazaqstanda paramen ustalǵandardy, ıaǵnı jemqorlardy elden shyǵýǵa tyıym salý jaǵy qarastyrylyp jatyr.