Májilis sheteldik bank fılıalyn ashý talabyn jeńildetetin zań jobasyn maquldady

ASTANA. KAZINFORM – Májilis zańnamaǵa qarjy naryǵynda tutynýshylardyń quqyqtaryn qorǵaý máseleleri boıynsha ózgerister men tolyqtyrýlar engizýge arnalǵan zań jobasyn birinshi oqylymda maquldady.

Zań jobasyn Qarjy naryǵyn retteý jáne damytý agenttiginiń tóraǵasy Mádına Ábilqasymova tanystyrdy.

Qujatta mynandaı jańashyldyqtar bar:
- qarjy uıymynyń basshylyq laýazymyna kandıdatty kelisý kezinde jumys ótili eskeriletin uıymdardyń tizbesin keńeıtilmek;
- janama bank holdıngteriniń óz basshy qyzmetkerlerin qarjy naryǵy men qarjy uıymdaryn retteý, baqylaý jáne qadaǵalaý jónindegi ýákiletti organmen kelisý mindetin alyp tastaý usynylyp otyr;
- ýaqytsha bolmaǵan basshy qyzmetkerdiń mindetterin atqarýdyń yqtımal merzimin reglamentteý kózdelgen;
- tsıfrlandyrýdy damytýǵa baılanysty ózektiligin joǵaltqan talaptardy ońtaılandyrý josparlanǵan.

«Túzetýlerdiń birinshi bóligi Qazaqstan sheteldik bankterdi ashý talaptaryn yryqtandyrýǵa, qarjy uıymdarynyń basshy qyzmetkerlerine ruqsat berý rásimderin jeńildetýge baǵyttalǵan. Memleket basshysy elimizge úsh senimdi sheteldik bankti tartý týraly mindet qoıdy. Qazirgi ýaqytta ınvestorlarǵa enshiles uıymdy nemese fılıaldy ashýǵa ruqsat berý protsesi eki kezeńnen turady. Birinshisi – ruqsat berý, ekinshisi – lıtsenzııalaý. Osy oraıda sheteldik bankterin fılıalyn ashýǵa qajetti qujattardyń tizimin qysqartý usynylyp otyr. Qujattar sany sheteldik bas kompanııanyń reıtıngine baılanysty bolady. Qazir 24 qujat bolsa, banktiń reıtıngine qaraı 17 qujatqa nemese 87 qujatqa deıin qysqartylady. Sonymen qatar sheteldik banktiń aktıvterine qoıylatyn talaptar 20 mlrd dollardan 10 mlrd dollarǵa deıin tómendetiledi. Budan basqa sheteldik bank fılıaldaryna ruqsat etilgen qyzmet túrleri keńeıtiledi», - dedi Mádına Ábilqasymova.