Májilis selektsııalyq jetistikterdi qorǵaý jónindegi zańdy qaraıdy
ASTANA. KAZINFORM – Parlament Májilisiniń qaraýyna «Selektsııalyq jetistikterdi qorǵaý týraly» zań jobasy men ilispe qujat engizildi.
- Bul zań jobalary ósimdikterdiń jańa suryptary men maldyń jańa tuqymdaryn qorǵaýdyń tıimdi júıesin qurý, zań normalaryn Ósimdikterdiń jańa sorttaryn qorǵaý jónindegi halyqaralyq konventsııanyń erejelerine sáıkestendirý maqsatynda ázirlendi. Qujat halyqaralyq qaǵıdattar men erejelerge sáıkes selektsıonerlerdiń ıntellektýaldyq jetistikterin qorǵaýdyń quqyqtyq negizin qalyptastyrýdy kózdeıdi, - dedi depýtat Serik Egizbaev.
Onyń aıtýynsha, zań jobasyn qabyldaý Ulttyq patent júıesin jahandyq júıege ıntegratsııalaýǵa, baǵaly bastapqy selektsııalyq materıaldardy qoljetimdi etýge, otandyq selektsııa jáne Qazaqstanda tuqym sharýashylyǵyn damytýǵa ınvestıtsııa tartýǵa, otandyq selektsııada alynǵan sorttardy álemdik naryqqa shyǵarýǵa múmkindik beredi.
- Іlispe zań jobasy Azamattyq kodekske jáne Tuqym sharýashylyǵy týraldy zańǵa tuqymdy paıdalanýǵa baqylaýdy kúsheıtýdi, sondaı-aq ony halyqaralyq standarttarǵa sáıkestendirý bóliginde ózgerister engizýdi kózdeıdi. Májilistiń Agrarlyq máseleler komıteti atalǵan jobalary boıynsha qorytyndy ázirleýge daıyn, - dedi depýtat.
Budan buryn habarlanǵandaı, alǵash ret maıly zyǵyrdy jedel selektsııalaý baǵdarlamasy iske qosyldy.
