Májilis saýsaq izin tapsyrý mindeti týraly bastamany zańnan alyp tastady

Májilis tólqujat pen jeke kýálik rásimdeıtin azamattardy saýsaq izin tapsyrýǵa mindetteý týraly bastamany zańnan alyp tastady. Biraq bul talap sheteldik azamattar úshin mindetti bolyp qalady, dep habarlaıdy Kazinform.

«Memlekettik korporatsııa máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda talqylaǵan depýtattar osyndaı sheshim qabyldady.

Jalpy atalǵan zań jobasynda 17 zańnamalyq aktige, onyń ishinde Qazaqstan Respýblıkasynyń 5 kodeksine jáne 12 zańyna ózgerister men tolyqtyrýlar engizý kózdelgen.

Jalpy bul zań jobasy 2023 jylǵy 4 qazanda birinshi oqylymda maquldanǵan bolatyn. Bul joly depýtattar birneshe túzetýler qosyp otyr.

Ol túzetýlerdiń negizgi tezısteri mynandaı:

- «Azamattarǵa arnalǵan úkimet» memlekettik korporatsııasy» kommertsııalyq emes aktsıonerlik qoǵamy qyzmetkerleriniń sanattaryn naqtylaý;

- ótinishterdi kásipkerlik sýbektileri arqyly áriptestik kelisimder negizinde qabyldaý jáne memlekettik qyzmet kórsetýdiń daıyn nátıjelerin berý múmkindigin usyný;

- Memlekettik korporatsııanyń kórsetiletin qyzmetti alýshynyń qalaýy boıynsha jeke aqyǵa qosymsha servıstik qyzmetter kórsetý;

- «Astana Hab» halyqaralyq tehnologııalyq parki qatysýshylaryn ornalastyrý talaptaryn ońtaılandyrý;

- Qazaqstan Respýblıkasy azamattarynyń jeke kýáligin jáne (nemese) Qazaqstan Respýblıkasy azamatynyń pasportyn alǵan kezde daktıloskopııalyq tirkeýden ótý mindettiligin alyp tastaý.

«Qujattardy alǵan kezde daktıloskopııalyq tirkeýden ótý mindettiligi alynyp tastalady. Qazaqstandyqtar tirkeýden óz erkimen óte alady. Bul rette daktıloskopııa sheteldik azamattar úshin mindetti bolyp tabylady», - dedi Májilis depýtaty Ekaterına Smyshlıaeva.

Depýtattar zańdy qabyldap, Senat maquldaýyna jiberý týraly sheshim qabyldady.