Májilis Salyq zańnamasyna Senat engizgen ózgeristerge kelisti

Májilistiń jalpy otyrysynda palata depýtattary «Salyq jáne bıýdjetke tólenetin basqa da mindetti tólemder týraly» Kodeksine jáne «Salyq jáne bıýdjetke tólenetin basqa da mindetti tólemder týraly» Kodeksin qoldanysqa engizý týraly» Zańyna ózgerister men tolyqtyrýlar engizý týraly» Zańyna qatysty Senat jańa redaktsııada usynǵan jekelegen baptarmen kelisti, dep habarlaıdy Kazinform.

Búgin Senat depýtattary Salyq kodeksine túzetýler engizip, Májiliske qaıtarǵan bolatyn.

Senat usynǵan ózgertýler mynandaı:

- memlekettik emıssııalyq baǵaly qaǵazdardy ótkizýden túsetin qunnyń syıaqysymen jáne ósimimen baılanysty kiristerge qatysty salyq salynatyn kiristiń azaıýyn boldyrmaý jónindegi normalardy 2030 jylǵy 1 qańtarǵa deıin keıinge qaldyrý;

- Ulttyq bank shyǵarǵan memlekettik emıssııalyq baǵaly qaǵazdar boıynsha ekinshi deńgeıdegi bankter alǵan kiristerge qatysty salyq salynatyn kiristiń azaıýyn boldyrmaý jónindegi normalardy 2024 jylǵy 1 naýryzdan bastap qoldanysqa engizý;

- Salyq kodeksiniń 3-baby 2-tarmaǵynyń toqtatyla turǵan ýaqytsha normasynyń qoldanylý merzimin 2023 jylǵy 1 jeltoqsannan 2024 jylǵy 1 naýryzǵa ózgertý.

Májilis atalǵan ózgeristerge kelisip, Parlament zańdy qabyldady.