Májilis Salyq kodeksiniń jańa jobasyn birinshi oqylymda maquldady

ASTANA. KAZINFORM – Májilis Salyq kodeksiniń jańa jobasyn birinshi oqylymda maquldady.

Qujat jobasyn 4 saǵat boıy talqylaǵan depýttardyń basym kópshiligi jańa redaktsııany qoldap daýys berdi. Qalys qalǵandar sany – 9, qarsy bolǵandar – 7, 1 depýtat daýys bermedi.

Sondaı-aq «Aq jol», JSDP men Qazaqstan halyq partııasynyń fraktsııa tóraǵalary kodeks jobasy ózderi qospaq bolǵan usynystardy engizgen jaǵdaıda ǵana qabyldaný kerek degen ustanymdaryn aıtty.

Qujatty depýtattarǵa Premer-mınıstrdiń orynbasary – Ulttyq ekonomıka mınıstri Serik Jumanǵarın tanystyrǵan bolatyn.

Onyń sózinshe, QQS salynatyn aınalymnyń tómengi shegi 40 mln teńge bolýy múmkin. 

Osy sheshimniń aıasynda Úkimet jeke kásipkerlikti tirkeý rásimin qatańdatpaq. 

Vıtse-premer QQS-tiń tómengi shegi 40 mln teńge bolsa, salyq túsimi qansha bolatynyn da aıtty. 

Al aqyly medıtsınalyq qyzmetterge 10% QQS salyný usynylyp otyr.

Sondaı-aq, aýylsharýashylyq taýar óndirýshiler QQS-tan tolyq bosatylmaıtyn boldy. 

Jańa redaktsııada 1,3 trln teńgeden asatyn 128 salyq jeńildigin alyp tastaý usynylǵan. 

Sonymen birge, Serik Jumanǵarın korporatıvtik tabys salyǵynyń mólsherlemesi ósetin salalardy atady. 

Sondaı-aq, ol sán-saltanat salyǵy kimderge salynatyn aıtty. Naqtyraq aıtsaq, quny 450 mln teńgeden asatyn jyljymaıtyn múlik ıeleri ulǵaıtylǵan salyq tóleıdi. 

Al jyldyq tabysy 33,4 mln teńgeden asatyn azamattar tabysynyń 15 paıyzyn salyqqa tóleýi múmkin. 

Usynylyp otyrǵan reforma boıynsha, salyq esebin tapsyratyndar sany 30 paıyzǵa qysqarmaq. 

Serik Jumanǵarınniń paıymdaýynsha, úı janyndaǵy dúkender men shashtarazdar ıelerine bul reformadan qorqýdyń qajeti joq. Sondaı-aq, vıtse-premer jańa Salyq kodeksiniń qaǵıdaty boıynsha baılar kóbirek salyq tóleýge tıis ekenin aıtty.

Kodekstiń jańa redaktsııasyna BAQ-ty QQS-dan bosatý týraly usynystar enbegeni belgili boldy.