Májilis rezervtegi áskerı qyzmetke qatysty zańdy qabyldady
ASTANA. KAZINFORM — Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine rezervtegi qyzmet máseleleri boıynsha ózgerister men tolyqtyrýlar engizý týraly» Zańy ekinshi oqylymda qaralyp, qabyldandy.
— Rezervtegi qyzmet máseleleri boıynsha zań jobasyn ázirleý áskerge jumyldyrý daıyndyǵy men jumyldyrý júıesin odan ári jetildirý qajettiligine baılanysty týyndaǵan. Zańnamalyq aktilerge engizý úshin ázirlengen túzetýler áskerı bólimderdi daıyndalǵan kadrlarmen tolyqtyrýǵa jáne jaýyngerlik is-qımyldarǵa daıyn rezervtik kúshter qurýǵa múmkindik beredi. Áskerı qyzmettiń bul túrin engizý beıbit ýaqytta Qarýly Kúshterdiń sanyn kóbeıtpeı, qoıylǵan mindetterdi oryndaýǵa daıyn azamattardyń belgili bir mólsherin daıyndaýǵa múmkindik beredi, — dedi Májilis depýtaty Ermurat Bapı.
Zań jobasyn qaraý barysynda Parlament Májilisiniń depýtattary 100-ge jýyq túzetý engizdi, onyń ishinde 6 kodeks pen 14 zań qamtyldy.
— Qujattyń negizgi novellalary: áskerı qyzmettiń jańa túrin engizý — «rezervtegi áskerı qyzmet» jáne áskerı qyzmetshiniń jańa sanaty — «rezervte áskerı qyzmet ótkerip júrgen áskerı qyzmetshi», basqa sózben aıtqanda, «rezervtegi áskerı adam» retinde sanalady. Depýtattar rezervtegi áskerı qyzmetke kiretin adamdarǵa qoıylatyn talaptardy, olardyń áskerı qyzmet ótkerý tártibin, olardyń quqyqtary men mindetterin belgileıtin normalardy pysyqtady. Osy normalardy retke keltirý, sondaı-aq «Áskerı qyzmet jáne áskerı qyzmetshilerdiń mártebesi týraly» Zań mátininiń jazylý qısyny maqsatynda, depýtattar áskerge shaqyrý boıynsha jáne kelisimshart boıynsha áskerı qyzmetke uqsas rezervtegi áskerı qyzmetti ótkerý erekshelikterin kózdeıtin normalardy jeke taraý retinde júıelendirdi, — dedi E. Bapı.
Depýtattar osy zań jobasyn qaraý sheńberinde engizgen túzetýlerdiń kelesi blogy — ol áskerı rezervshilerdiń eńbek qatynastary men áleýmettik qamsyzdandyrylýyna qatysty túzetýler. Atap aıtqanda, túrli aqshalaı tólemderge (áskerı qyzmet ótkerý kezinde alǵan jaraqattary úshin ótemaqy tólemderi, múgedektigi boıynsha memlekettik áleýmettik járdemaqy jáne t. b.), zattaı jáne azyq-túlikpen qamtamasyz etýge, áskerı rezervıstke medıtsınalyq qyzmet kórsetýge, jumys isteıtin áskerı rezervıstiń eńbek qatynastaryna qatysty normalar usynyldy. Sonymen qatar, áskerı rezervshilerdiń mindetti áleýmettik medıtsınalyq saqtandyrylýyna aýdarymdar men jarnalardy retteıtin normalar engizdi.
— Munymen qosa, depýtattar áskerı quqyq buzýshylyq sýbektisi retinde rezervtegi áskerı adamnyń qylmystyq jaýaptylyǵyna qatysty túzetýlerdi pysyqtady. Odan basqa, Shekara qyzmeti men Ulttyq ulannyń qyzmetin retteıtin zańnamaǵa osy kúsh qurylymdarynyń rezervinde áskerı qyzmet ótkerýge múmkindik beretin tolyqtyrýlar bar. Qazaqstan Prezıdenti Qasym-Jomart Toqaevtyń 2023 jyldyń 16 qyrkúıektegi № 353 Jarlyǵyn iske asyrý maqsatynda, jekelegen memlekettik organdardyń keıbir qyzmetin qaıtadan qurý úshin, zań jobasynyń ataýy ózgergeni týraly atap ótken jón. Endi zań jobasy «Qazaqstan Respýblıkasynyń keıbir zańnamalyq aktilerine rezervtegi áskerı qyzmet jáne ortalyq memlekettik organdardyń keıbir qyzmetin qaıtadan bólý máseleleri boıynsha ózgerister men tolyqtyrýlar engizý týraly» dep atalady, — dedi depýtat.
Májilistiń jalpy otyrysynda depýtattar zańdy qabyldap, ony Parlament Senatynyń qaraýyna joldady.
Eske salsaq, jaqynda áskerı bólimderdegi beınebaqylaý kameralaryn baqylap, saraptaıtyn jańa qyzmet túri engizildi.