Májilis respýblıkalyq bıýdjet týraly zańdy qabyldady
QR Parlamenti Májilisi «2024 - 2026 jyldarǵa arnalǵan respýblıkalyq bıýdjet týraly» zańdy qabyldady, dep habarlaıdy Kazinform.
«Jalpy alǵanda, bıýdjettiń bul parametrleri áleýmettik jáne basqa da mindettemelerdi ýaqytyly oryndaýǵa, sondaı-aq Memleket basshysynyń tapsyrmalaryn sapaly júzege asyrýǵa múmkindik beredi. Májiliste zań jobasy keńinen talqylandy. komıtetter men jumys toptarynyń 25 otyrysy ótkizildi. Onda depýtattardyń 300-den astam saýalyna jaýap berildi. Barlyq fraktsııamen jumys júrgizildi. «AMANAT» fraktsııasynyń keńeıtilgen jınalysy ótkizildi», - dedi Úkimet basshysynyń orynbasary, Qarjy mınıstri Erulan Jamaýbaev Májilistiń jalpy otyrysynda.
Mınıstrdiń aıtýynsha, depýtattar kótergen máseleler, ásirese óńir qajettilikteri barynsha eskerildi.
«Nátıjesinde 2,5 trln teńgege jýyq qarajat mańyzdylyǵyna qaraı qaıta bólindi. Onyń ishinde Úkimet rezervi esebinen 56 mlrd teńge qosymsha qarastyryldy. Qorytyndylaı kele, bıylǵy zań jobasyn talqylaýǵa belsendilik tanytqan depýtattarǵa alǵys bildiremiz. Zań jobasyn qoldaýlaryńyzdy suraımyn», - deıdi ol.
