Májilis radıatsııalyq qaýipsizdikke qatysty qujatty qabyldady
ASTANA. KAZINFORM — Búgin Májilistiń jalpy otyrysynda «TMD-ǵa qatysýshy memleketterdiń radıatsııalyq jaǵdaı monıtorınginiń derekterimen almasý kezindegi ózara is-qımyly týraly kelisimdi ratıfıkatsııalaý týraly» Zań qabyldandy.
— Ataýyna sáıkes atalǵan qujat ýákiletti organdardyń radıatsııalyq jaı-kúıi týraly, onyń ózgeristeri, sondaı-aq radıoaktıvti zattardy transshekaralyq tasymaldaý qaýpi nemese faktileri týyndaǵan kezde aqparattyq yntymaqtastyq is-qımyldaryn úılestirýdi kózdeıdi. Ózderińiz biletindeı, qazirgi ýaqytta mınıstrlikke qarasty «Qazgıdromet» ulttyq qyzmeti elimizdiń barlyq óńirinde ornalasqan selıtebti aýmaqtarda beta-belsendilikti jáne gamma-sáýleni ólsheý arqyly radıatsııalyq fon deńgeıine monıtorıng júrgizedi. Bul rette, elimizdiń geografııalyq ornalasýyn eskerip, Táýelsiz Memleketter Dostastyǵy elderiniń aýmaǵynda radıatsııalyq monıtorıng derekterimen almasýdyń biryńǵaı tetigin engizý — tsıfrlyq zamannyń ózekti talaby. Sonymen qatar, halyqaralyq qoǵamdastyqta osy saladaǵy ózara is-qımyldyń uqsas ádisteri qoldanylatynyn aıta ketý kerek, — dedi Ekologııa jáne tabıǵı resýrstar mınıstri Erlan Nysanbaev.
Onyń aıtýynsha, usynylǵan kelisim jobasyna sáıkes, odaqtas memleketterge elimizdiń memlekettik radıatsııalyq monıtorıng júıesinen alynatyn derekter ǵana beriledi. Buǵan qosa Kelisimdi iske asyrý barysynda normatıvtik-quqyqtyq aktilerdiń qabyldanýy qajet etilmeıdi.
— Atalǵan qujatty ratıfıkatsııalaý qajetti aqparatpen jedel almasýǵa, sondaı-aq adam ómirine, onyń densaýlyǵyna jáne qorshaǵan ortaǵa tóngen qaýipke shuǵyl den qoıý sharalaryn qabyldaýǵa múmkindik beredi, — dedi mınıstr.
Budan buryn habarlanǵandaı, Qazaqstan men Belarýs ıadrolyq jáne radıatsııalyq qaýipsizdik salasynda memorandýmǵa qol qoıdy.
