Májilis pen Reseı Dýmasy arasyndaǵy palataaralyq parlamenttik komıssııanyń otyrysy ótti
ASTANA. KAZINFORM — Májilis tóraǵasy Erlan Qoshanovtyń qatysýymen Qazaqstan Respýblıkasy Parlamenti Májilisi men Reseı Federatsııasy Federaldyq Jınalysy Memlekettik Dýmasy arasyndaǵy yntymaqtastyq jónindegi palataaralyq parlamenttik komıssııanyń otyrysy ótti.
Otyrys aldynda Májilis tóraǵasy Memlekettik Dýma tóraǵasynyń birinshi orynbasary, Reseı tarapynan komıssııanyń teń tóraǵasy Aleksandr Jýkovty qabyldady.
Astanada ótken otyrysty ashyp bergen palata spıkeri Reseı Qazaqstannyń senimdi odaqtasy jáne strategııalyq seriktesi ekenin atap ótti.
— Jyl ótken saıyn bizdiń qarym-qatynasymyz tek nyǵaıa túsýde. Buǵan kóshbasshylarymyz Qasym-Jomart Kemeluly Toqaev pen Vladımır Vladımırovıch Pýtınniń arqasynda qol jetkizdik. Memleketter basshylary áriptestikti damýdyń jańa deńgeıine kóterdi. Qazaqstanda halyqtarymyzdyń sanǵasyrlyq dostyǵy erekshe baǵalanady, — dedi Erlan Qoshanov.
Májilis spıkeri eki eldi álemdegi eń uzynshekara baılanystyratynyn aıtyp, byltyr ózara saýda kólemi aıtarlyqtaı óskenine, taýar aınalymynyń shamamen 70 paıyzy óńiraralyq jáne shekara mańy saýdasyna tıesili ekenine nazar aýdardy.
— Ekijaqty qatynasty damytýda parlamentaralyq yntymaqtastyq mańyzdy ról atqarady. Biz túrli alańdarda jıi kezdesemiz, pikir almasamyz. Bizdiń ár basqosýymyz jańa ıdeıalar men bastamalarǵa toly. Kóptegen ózekti másele boıynsha árdaıym ortaq sheshimge keletinimiz qýantady. Búgin uzaq ýaqyttan keıin komıssııamyzdyń jumysyn qaıta jandandyrǵanymyz da — birlesip jumys isteýge yntalylyǵymyzdyń aıǵaǵy, — dedi Erlan Qoshanov.
Memlekettik Dýma tóraǵasynyń birinshi orynbasary Aleksandr Jýkov óz sózinde eki el prezıdentteriniń ýaǵdalastyqtarynyń iske asyrylýyn zańnamalyq turǵydan qamtamasyz etý, Qazaqstan men Reseı azamattaryn tolǵandyratyn máselelerdi sheshý de óte mańyzdy ekenin atap ótti.
Sondaı-aq kún tártibine qorshaǵan ortany, transshekaralyq ózenderdi tıimdi paıdalaný salasyndaǵy yntymaqtastyq, ekijaqty taýar aınalymy kólemin ulǵaıtý men ózara saýdadaǵy kedergilerdi joıý jáne basqa da máseleler kirdi.
Komıssııa jumysyna Qazaqstan tarapynan vıtse-mınıstrler men jaýapty memlekettik qurylymdar basshylary qatysty.
Talqylaý qorytyndysy boıynsha qatysýshylar kún tártibindegi ár tarmaq boıynsha memlekettik organdarǵa usynymdarázirlep, sheshimder shyǵardy.
