Májilis paıdaly qazba kenishin barlaýǵa ótinish berý tártibin ońtaılandyratyn zań jobasyn maquldady

ASTANA. KAZINFORM – Qujatty Ónerkásip jáne qurylys mınıstriniń orynbasary Iran Sharhan tanystyrdy.

Aıtýynsha, ken bar dep boljanǵan ýchaskeni barlaýǵa ótinim berý protsesi qysqartylmaq. Qazir «birinshi ótinim» qaǵıdaty bar bolǵanmen zertteý uqsatyn berý úshin eki kezeńde júzege asady.

Birinshi kezeńde memleket zertteýge jatatyn ýchaskelerdi irikteıdi. Ekinshi kezeńde iriktep alynǵan ýchaskelerge ótinim bergen kompanııalardyń usynystary baǵalanyp, olardyń daıyndyq deńgeıi, tájirıbesi, qarjylyq múmkindigi tekseriledi. Osydan keıin ǵana eń laıyq degen kompanııaǵa lıtsenzııa beriledi. Usynylyp otyrǵa norma osy tártipti joıyp, ótinishti Biryńǵaı platformaǵa tikeleı beretindeı múmkindik usynýǵa arnalyp otyr.

— Qazir paıdaly qatty qazbalardy barlaý úshin jer qoınaýyna qol jetkizý mehanızmi «birinshi ótinim» qaǵıdaty boıynsha, Memlekettik jer qoınaýy qory basqarmasynyń baǵdarlamasy arqyly bloktardy eki kezeńmen irikteý arqyly júzege asyrylady. Zań jobasynda bul eki kezeńdilik alynyp tastalyp, ótinimderdi tikeleı Biryńǵaı platforma arqyly berý kózdelip otyr. Onda barlaýǵa ashyq aýmaqtar men bloktar berýge tyıym salynǵan aýmaqtar — eldi mekender, ulttyq parkter, qoryqtar, qorǵanys jerleri jáne t. b. — ınteraktıvti kartada bekitilgen, — dedi vıtse-mınıstr.

Sondaı-aq, ol zań jobasy qatty paıdaly qazbany tájirıbe úshin óndiremiz degen syltaýmen jasyryn ıgerýge tyıym salatynyn aıtty.

— Mundaı jaǵdaılar lıtsenzııanyń dereý keri qaıtarylýyna ákeledi. Osy maqsatpen taý-ken massasyn jáne topyraqty 1000 tekshe metrden astam kólemde alý úshin qajettilikti dáleldeý kerek bolady., Jartylaı ónerkásiptik synamalardy alý úshin de osyndaı talapty oryndaý kerek, — dedi Iran Sharhan.

Depýtattar qujatty birinshi oqylymda maquldady 

Buǵan deıin jyl basynan beri jer qoınaýyn paıdalanýshylarmen 17 kelisimshart buzylǵanyn jazǵan edik.