Májilis otbasylardyń turǵyn úı jaǵdaıyn jaqsartýǵa baǵyttalǵan zańdy qabyldady

ASTANA. KAZINFORM – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine turǵyn úı saıasatyn reformalaý máseleleri boıynsha ózgerister men tolyqtyrýlar engizý týraly» Zańy ekinshi oqylymda qaralyp, qabyldandy.

Bul qujat 2023 jylǵy 22 qarashada birinshi oqylymda maquldanǵan edi.

«Zańda Memleket basshysynyń tapsyrmasy boıynsha Otbasy bankin «tolyqqandy damý ınstıtýty» etip, azamattardy esepke qoıý men turǵyn úılerdi bólýdi ortalyqtandyrýǵa baǵyttalǵan normalar kózdelgen. «Turǵyn úımen qamtý ortalyǵy» zańynda jańa elektrondyq málimetter bazasyn qurý eskerilgen. Zańda áskerı qyzmetti atqarý, quqyqtyq tártipti qorǵaý kezinde, sondaı-aq adam ómirin qutqarý kezinde qaza tapqan adamdardyń otbasyn bir jyldan keshiktirmeı turǵyn úımen qamtamasyz etý boıynsha norma engizilgen», - dedi Májilis depýtaty Ulyqbek Tumashınov.

Qujatty ekinshi oqylym aıasynda talqylaý barysynda tıisti usynystar qaraldy.

«Birinshiden, «Otbasy banki» ekinshi deńgeıdegi bankter júıesinde jáne depozıtterge mindetti kepildik berý júıesinde saqtalyp qaldy. Sondaı-aq, «Otbasy bankiniń» qyzmetin lıtsenzııalaý da saqtalatyn bolady. Ekinshiden, zań jobasyna «satyp alý quqyǵynsyz» azamattarǵa jalǵa berilgen turǵyn úılerdi – endi «jekeshelendirý quqyǵyn berý» týraly usynys engizildi. Osy usynys qoldaý tapty. Qazir satyp alý quqyǵynsyz beriletin turǵyn úıler halyqtyń áleýmettik osal toptaryna ǵana beriletini belgili. Bul azamattarǵa jalǵa beriletin baspanany jekemenshik retinde qaldyq qunymen alýǵa múmkindik beredi. Mundaı jańa jekeshelendirý quqyǵyn barlyq óńirde halyqtyń áleýmettik osal toptaryndaǵy 51 myń azamat paıdalana alady. Úshinshiden, jalǵyz baspanasy «apatty turǵyn úı» dep tanylǵan úıdiń ornyna berilgen turǵyn úıdi jekeshelendirý quqyǵyn berý engizilip otyr. Bul norma da qoldaý tapty. Bul usynys 1600-den astam adamnyń máselesin sheshýge baǵyttalǵan», - dedi depýtat.

Onyń sózine qaraǵanda, asyraýshysynan aıyrylǵan adamdardyń múddelerin qorǵaý maqsatynda «jesirler» sanaty – jeke derbes sanatqa bólindi. Ol halyqtyń áleýmettik osal toptary tizimine jańa sanat retinde qosyldy. Bul túzetýdi depýtattar engizip, Úkimet qoldady.

Budan buryn habarlanǵandaı, atalǵan zań 51 myń otbasyǵa arendalyq baspanany «qaldyq qunymen» satyp alýǵa múmkindik beredi.