Májilis OPEK damý qorymen aradaǵy operatsııalarǵa qatysty qujatty qabyldady
ASTANA. KAZINFORM — Búgin Májilistiń jalpy otyrysynda «Qazaqstan Úkimeti men ORES Halyqaralyq damý qory arasyndaǵy jeke sektordaǵy operatsııalardy uıymdastyrý týraly negizdemelik kelisimdi ratıfıkatsııalaý týraly» zańy qabyldandy.
— Jalpy, OPEK qory damýshy elderge qaryzdar men tehnıkalyq kómek arqyly qarjylyq qoldaýmen aınalysady. Qor qurylǵan sátinen bastap álemniń 125 elinde 4 myńnan astam jobany iske asyrýǵa 30 mlrd dollardan astam qarajat bóldi. Ortalyq Azııa elderine 20 jyl ishinde 1,4 mlrd dollardan astam qarjy saldy. Qordyń elde jumys isteýi úshin Negizdemelik kelisimdi ratıfıkatsııalaý mindetti shart, bul — onyń jarǵylyq qujattarynda belgilengen standartty shart. Qor qyzmetiniń negizgi baǵyttary ınfraqurylymdy salý jáne damytý, klımattyń ózgerýine qarsy kúres jónindegi sharalar ázirleý, azyq-túlik qaýipsizdigin qamtamasyz etý, energetıkalyq aýysýǵa járdemdesý, tsıfrlandyrý jáne ınnovatsııalar, ShOB úshin ekonomıkalyq múmkindikter jasaý, — dedi Ulttyq ekonomıka birinshi vıtse-mınıstri Azamat Ámrın.
Qor kelesi qyzmet túrlerin qarjylandyrýy múmkin:
1) kommertsııalyq jáne ınvestıtsııalyq bankter, lızıngtik jáne ıpotekalyq kompanııalar;
2) ShOB-qa baǵyttalǵan tikeleı ınvestıtsııalar qorlary;
3) ulttyq nemese óńirlik damý qorlary;
4) mıkro-qarjy uıymdaryn qarjylandyrýy múmkin.
Paıyzdyq mólsherlemeler jyldyq eki jarymnan — bes paıyzǵa deıin quraıdy. Jeńildik kezeńi — 6 aıdan 24 aıǵa deıin bolady. Qaryz alý merzimi 22 jylǵa deıin bolýy múmkin. Sondaı-aq, jeke sektordyń barlyq jobalary Úkimetpen kelisiletinin atap ótken jón. Bul belgili bir saladaǵy qajetsiz kelisimderdiń aldyn alýǵa múmkindik beredi. Kelisimdi ratıfıkatsııalaý qordy tikeleı salyq tóleýden bosatýǵa, oǵan jáne onyń aktıvterine ımmýnıtetter men artyqshylyqtar berýge múmkindik beredi. Salyqtan bosatý tek qordyń salǵan qarajatynyń somasyna jáne onyń kredıtterdi qaıtarýdan túsken qarjylyq paıdasyna ǵana qatysty bolady.
— OPEK qorymen kelisimdi ratıfıkatsııalaý eldiń jalpy ınvestıtsııalyq ahýalyna oń áser etetinin belgileımin. Bul rette qordyń qaryz qarajatyn tartý syrtqy memlekettik boryshqa áser etpeıtinin atap ótkim keledi. Zań jobasy teris áleýmettik-ekonomıkalyq jáne quqyqtyq saldarǵa ákelmeıdi, sonymen qatar ulttyq qaýipsizdikti qamtamasyz etýge yqpal etpeıdi, — dedi vıtse-mınıstr.
Eske salsaq, jaqynda Qazaqstan men OPEK+ elderi qańtar-naýryzda munaı óndirý parametrlerin ýaǵdalasty.