Májilis Omanmen salyq málimetterin almasý týraly kelisim ornatatyn zań qabyldady
ASTANA. KAZINFORM – Májilis Qazaqstan Úkimeti men Oman Úkimeti arasyndaǵy tabys pen kapıtalǵa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly kelisimdi ratıfıkatsııalaý týraly» zańdy qabyldady.
Qujatty Qarjy mınıstriniń orynbasary Erjan Birjanov Qazaqstan buǵan deıin negizgi ınvestor eldermen dál osyndaı 55 salyqtyq kelisim jasasqanyn aıtty.
- Omanmen kelisim osy jumystyń jalǵasy bolyp esepteledi. Kelisim qosarlanǵan salyq salýdy joıý jáne salyqtyq kemsitýshilikti boldyrmaý arqyly tehnologııalar men daǵdylar transfertine yqpal etedi. Kelisim salyqtyq maqsattarda aqparat almasý úshin de zańnamalyq negiz bolady, - dedi ol.
Mınıstrliktiń málimeti boıynsha, bıyl osy mándegi kelisimderdi Iran Islam Respýblıkasymen, Mysyrmen, Izraıl, Kýveıt memleketterimen, Portýgalııamen, Ázerbaıjanmen, Indonezııamen, Taılandpen jańartyp bekitýdi josparlanǵan.
Kelisim mynandaı máselelerdi retteıdi:
- salyq salý maqsatynda rezıdenttikti anyqtaý;
- turaqty mekeme qurý;
- salyq salýǵa jatatyn tabysty bólý (dıvıdendter, paıyzdar, roıaltı, kásipkerlik qyzmetten túsetin tabys jáne t.b.);
- salyq salýda kemsitýge jol bermeý;
- eki memlekettiń ýákiletti organdary arasyndaǵy ózara kelisim mehanızmi;
- salyqtyq aqparat almasý tártibi;
- jeńildikterdi shekteý týraly baptar.
Eske salsaq, Taıaý Shyǵystaǵy ahýal shıeleniskende Qazaqstannyń 467 azamaty Dýbaıdan Oman arqyly elge jetkizilgen bolatyn.
