Májilis mopedke jáne velosıpedke qatysty jańa talaptardy qamtyǵan zańdy qabyldady

ASTANA. KAZINFORM – Búgin Májilistiń jalpy otyrysynda «Jol júrisi týraly» Zańyna jekelegen kólik quraldary túrleriniń júrýin uıymdastyrý jáne jol qaýipsizdigin tsıfrlandyrý máseleleri boıynsha ózgerister men tolyqtyrýlar engizý týraly» Zańy men ilispe qujat ekinshi oqylymda qaralyp, qabyldandy.

«Qujattardy talqylaý barysynda Parlament Májilisinde tıisti naqtylaýlar engizildi. Mopedterdi memlekettik tirkeý zań qabyldanǵannan soń 6 aıdan keıin bastalady. Júrgizýshide A, B, C sanatyndaǵy kýálikteri bolǵan jaǵdaıda mopedterdi basqarýǵa «A1» sanaty avtomatty túrde beriledi. Qozǵaltqyshy bar velosıped uǵymy naqtylandy. ıAǵnı qozǵaltqyshy bar velosıpedti jaıaý júrýge arnalǵan joldar men trotýarlarda júrgizýge tyıym salynady», - dedi Májilis depýtaty Ekaterına Smyshlıaeva.

Onyń aıtýynsha, atalǵan zań aıasynda kólik quraldaryn tehnıkalyq baıqaýdan ótkizetin uıymdarǵa qoıylatyn talaptar kúsheıtiledi.

«Kólik quralynyń gabarıtteri men salmaǵy bóliginde joldardaǵy tsıfrlyq júıelermen ereje buzýdy avtomatty túrde tirkeý tártibi ózgerip jatyr. Sonymen qatar, jolaýshylardy tasymaldaý qaýipsizdigine, kólik júrgizýshilerin oqytýǵa qatysty birqatar qosymsha talap engiziledi. Osy jáne basqa da birqatar usynystar redaktsııany jaqsartady jáne zań jobasynyń mazmunyn tolyqtyrady», - dedi depýtat.

Eske salsaq, bul zań jobalary Májiliste bıyl 17 sáýirde birinshi oqylymda maquldanǵan edi. 

Zań jobalarynda:

- qozǵaltqysh kólemi 50 tekshe santımetrden kem mopedterdi memlekettik tirkeý;
- moped júrgizýshine qoıylatyn talaptardy belgileý;
- jergilikti atqarýshy organdarǵa elektr samokattardy paıdalaný tártibin aıqyndaý boıynsha quzyret berý;
- jol qaýipsizdigin tsıfrlandyrý boıynsha normalar usynyldy.