Májilis memlekettik statıstıka týraly zań jobasyn maquldady
ASTANA. KAZINFORM – «Qazaqstan Respýblıkasynyń keıbir zańnamalyq aktilerine memlekettik statıstıka jáne derekterdi basqarý máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańynyń jobasy Májilis otyrysynyń birinshi oqylymynda maquldandy.
«Memleket basshysy statıstıkalyq aqparatty qalyptastyrý tásilderin ózgertý jóninde birneshe ret tapsyrma berdi. Úlken derekter men tsıfrlandyrýdyń damý dáýirinde aqparat jınaýdyń eski ádisteri ózektiligin joǵaltady. Zań jobasy derekterdi basqarý jáne statıstıkalyq aqparatty qalyptastyrý tásilderin qaıta qaraý úshin quqyqtyq jaǵdaılar jasaıdy. Osy oraıda zań jobasyna sáıkes, birinshiden, derekterdi basqarý jónindegi talaptar úkimettiń qaýlysymen bekitiledi. Talaptarda jikteý, derekterge qol jetkizý jáne saqtaý erekshelikteri, derekter sapasyna qoıylatyn talaptar kózdelip otyr», - dedi Ekaterına Smyshlıaeva zań jobasyndaǵy ózgeristerge toqtala otyryp.
Onyń aıtýynsha, ákimshilik derekterdiń sapasyna baqylaý engiziledi jáne ýákiletti organ Ulttyq statıstıka bıýrosy bolady.
«Jańa zań jobasyna sáıkes balama derekter uǵymy engiziledi. Bul ákimshilik jáne statıstıkalyq emes derekter. Bıýromen kelisim boıynsha mundaı derekter statıstıkalyq esepterdi jasaý jáne derekterdi taldaý úshin usynylmaq. Sonymen qatar ulttyq anyqtamalyq aqparat uǵymy engiziledi-bul jikteýishter, katalogtar, anyqtamalyqtar men nomenklatýralar jıyntyǵy», - deıdi ol.
Odan bólek, ulttyq regıstrlerge quqyqtyq mártebe berý kózdelip otyr.
«Bul elektrondyq úkimet arhıtektýrasy sheńberinde barlyq salalar boıynsha etalondyq derekterdi qamtıtyn bazalar. Qaıtalaný, durys emes málimetter men jalǵandyq bolmaıdy. Sol sııaqty ǵylymı zertteýler maqsatynda jáne jasandy ıntellekt modelderin oqytý úshin derekterdi paıdalaný tártibi retteledi. Data-baqylaýshylar ınstıtýty engizilýde. Olar elektrondyq úkimettiń derekterin ulttyq tizilimderge sáıkes baǵalaıdy», - dedi E. Smyshlıaeva.