Májilis «Memlekettik satyp alý týraly» zań jobasyn birinshi oqylymda maquldady
ASTANA. KAZINFORM – Májilistiń jalpy otyrysynda «Memlekettik satyp alý týraly» zań jobasy jáne oǵan ilespe qujattardyń jobalary birinshi oqylymda maquldady.
Zań jobasynyń negizgi maqsaty - memlekettik satyp alý salasyndaǵy zańnamany odan ári jetildirý. Qujat satyp alynatyn taýarlardyń, jumystar men kórsetiletin qyzmetterdiń sapasyn arttyrýǵa, memlekettik satyp alý rásimderin ońaılatýǵa jáne odan ári avtomattandyrýǵa, biryńǵaı satyp alý platformasyn qurýǵa arnalǵan.
Qarjy mınıstri Mádı Tákıevtiń aıtýynsha, zań jobasynda eń aldymen satyp alynatyn taýarlardyń, jumystardyń, kórsetiletin qyzmetterdiń sapasyn arttyrý kózdeledi. Birinshiden, memlekettik organdardyń aqparattyq júıeleriniń derekterin keńinen paıdalaný arqyly,ónim berýshini tańdaýdyń baǵaǵa qatysty emes ólshemsharttary damytylady. Ekinshiden, qurylysqa baılanysty jumystar boıynsha qoǵamdyq monıtorıng engiziledi.
Úshinshiden, taýarlardy, jumystardy, kórsetiletin qyzmetterdi áleýmettik, ekonomıkalyq jáne ekologııalyq aspektilerdi eskere otyryp satyp alýǵa negizdelgen «Ornyqty memlekettik satyp alý» elementterin engizý kózdeledi. Tórtinshiden, sapaly taýarlardy satyp alýǵa yntalandyrý maqsatynda ómirlik tsıkl qunynyń eseptemesin qoldana otyryp, ótkiziletin satyp alýlardy odan ári damytylady.
«Budan basqa, satyp alynatyn taýarlar, jumystar men qyzmetterdiń sapasyn arttyrý maqsatynda Memleket basshysynyń 2024 jylǵy 7 aqpandaǵy Úkimettiń keńeıtilgen otyrysynda bergen tapsyrmalaryna sáıkes, memlekettik satyp alý júıesine «tolyq aıaqtalǵan» qurylys tetikterin, ofteık-kelisimsharttar jasasý arqyly taýarlardy satyp alý, sondaı-aq ónim berýshilerdiń jaýapkershiligin kúsheıtý máseleleri pysyqtalýda», - dedi Mádı Tákıev.
Sonymen qatar mınıstrdiń aıtýynsha, zań jobasy aıasynda satyp alý rásimderin ońaılatý jáne bıýrokratııadan aryltý, qurylys naryǵyn monopolııadan aryltý, satyp alý rásimderin odan ári avtomattandyrý, satyp alý boıynsha biryńǵaı platforma qurý josparlanyp otyr.
