Májilis Memlekettik qyzmet týraly zań jobasyn maquldady
ASTANA. KAZINFORM — Májiliste «QR memlekettik qyzmeti týraly» zań jobasy birinshi oqylymda maquldandy. Ondaǵy negizgi jańashyldyqtardy Memlekettik qyzmet isteri agenttiginiń tóraǵasy Darhan Jazyqbaı túsindirdi.
Atalǵan zań jobasy 2024-2029 jyldarǵa arnalǵan memlekettik qyzmetti damytý tujyrymdamasyn iske asyrý maqsatynda ázirlengen. Ol kásibı, ashyq jáne nátıjege baǵyttalǵan, ıaǵnı protsess úshin emes, adamǵa qyzmet etýi kerek.
— Kóptegen jyl boıy memlekettik qyzmetti zańnamalyq retteý tek eńbek qatynastary sheńberimen shektelip keldi. Mıssııa, qyzmettiń máni men mindetteri quqyqtyq turǵyda aıqyndalmaǵan. Biz osy olqylyqty joıyp, memlekettik qyzmettiń ulttyq basymdyqtardy júzege asyrý, negizgi ınstıtýttar retinde maǵynasyn naqty bekitip otyrmyz, — dedi Darhan Jazyqbaı Májilistiń jalpy otyrysynda.
Alǵash ret zań deńgeıinde memlekettik qyzmetti atqarýdyń negizderi aıqyn kórsetiledi. Otanshyldyq, kásibılik, ashyqtyq, klıentke baǵdarlanǵan qyzmet, etıka, minsiz bedel jáne quqyqbuzýshylyqtar men múddeler qaqtyǵysyna tózbeýshilik — abstraktili urandar emes, árbir memlekettik qyzmetshiniń mindetti oryndaýy tıis naqty talaptar. Olardy saqtamaý jaýapkershilik júkteıdi.
Mysaly klıentke baǵdarlanǵan qyzmet degenimiz — ótinishterden formaldy sebeptermen bas tartýǵa jol bermeý, ákimshilik, tsıfrlyq jáne quqyqtyq kedergilerdi joıý. Bul talaptardy oryndamaý memlekettik qyzmetti atqarýmen úılespeıdi.
— Ekinshiden, zań jobasynda servıstik qaǵıdaty dástúrli memlekettik qyzmettermen shektelmegen. Onyń maǵynasy keń jáne qoǵamǵa kórsetiletin qyzmetterdiń jalpy túsinigin qamtıdy. Bul adamdardyń kúndelikti ómirine tikeleı áser etetin qyzmetter — qorshaǵan ortany qorǵaý, quqyqtyq tártipti qamtamasyz etý, halyqtyń densaýlyǵy, bilim berý jáne basqalar. Mundaı qyzmetterdiń sapasyna qatysty naqty krıterııler belgilenedi jáne olardy baǵalaý ádisi retinde qoǵamdyq monıtorıng júrgiziledi, — dedi agenttik tóraǵasy.
Eń bastysy, azamattardyń pikiri memlekettik qyzmettiń sapasyn arttyrýda naqty septigin tıgizedi. Olardyń baǵalanýy memlekettik organdar tıimdiliginiń bir kórsetkishi bolyp, memlekettik qyzmetshilerdi yntalandyrý kezinde eskeriledi, sonyń ishinde materıaldyq turǵydan áser etedi.
Prezıdenttiń tapsyrmasyna sáıkes, memlekettik qyzmetshilerdiń qyzmetine sońǵy baǵa beretin tek qana azamattar bolýy kerek.
— Úshinshiden, Memleket basshysy Amanat partııasy uıymdastyrǵan aýyl ákimderiniń dıalog alańynda memlekettik qyzmet júıesindegi olardyń quqyqtyq mártebesin jan-jaqty pysyqtaýdy tapsyrǵan bolatyn. Osyǵan oraı, zań jobasynda saılanatyn laýazymdy tulǵalardy memlekettik qyzmetshilerdiń bólek sanatyna jatqyzý qarastyrylǵan (saıası jáne ákimshilik qyzmetshilermen qatar), — dep tolyqtyrdy spıker.
Osy sanattaǵy qyzmetshilerdiń quqyqtyq mártebesiniń erekshelikterin eskere otyryp:
- arnaıy kýrstar boıynsha oqytý tártibi belgilenedi;
- olar rotatsııadan, ýaqytsha basqa organǵa jiberýden jáne tálimgerlikten bosatylady;
- olardy teris qylyqtary úshin qyzmetten bosatý tek máslıhat sheshimimen júzege asyrylady.
Onyń aıtýynsha, saılanbaly memlekettik qyzmetshilerdiń aıryqsha mártebesi olarǵa zańdyq jaýapkershilikpen qatar, saılaýshylardyń senimin aqtap, olardyń aldynda da
jaýapty bolýyn júkteıdi. Olar ózderiniń saılaýaldy baǵdarlamalarynda
bergen ýádelerin is júzinde oryndaý jáne qabyldanǵan sheshimderi úshin halyq aldynda jaýap beredi.
Buǵan deıin Májilis tóraǵasy Erlan Qoshanov referendým nátıjesine qatysty pikirin aıtyp, depýtattyq korpýsqa alǵys bildirgen edi.
Jaqynda Parlament Prezıdent, Quryltaı, Halyq Keńesi, Astananyń mártebesi týraly birqatar mańyzdy zań jobalaryn qarastyrmaq.
