Májilis «Mass-medıa» týraly zań jobasyn maquldady

Májilis «Mass-medıa» týraly zań jobasyn birinshi oqylymda maquldady, dep habarlaıdy Kazinform.

Qujatty tanystyrǵan Mádenıet jáne aqparat mınıstri Aıda Balaeva memlekettik organdardyń BAQ-tyń resmı saýalyna jaýap berý merzimin 7 kúnnen 5 kúnge qysqartý normasy Eýropa qaýipsizdik jáne yntymaqtastyq uıymynyń tarapynan oń baǵalanǵanyn aıtyp qaldy.

«Zań jobasynda «mass-medıa», «grant», «biryńǵaı medıa platforma», «Jýrnalısterdiń quqyqtary týraly ulttyq baıandama» degen uǵymdar engiziledi», – dedi mınıstr.

A.Balaevanyń sózinshe, zań jobasynda mynadaı baǵyttaǵy normalar usynylyp otyr:

1. Buqaralyq aqparat quraldarynyń materıaldaryna qoıylatyn eskirý merzimin úsh jyl dep belgileý;
2. Buqaralyq aqparat quraldarynyń suraý salýlaryn qaraýdy jeti jumys kúninen bes jumys kúnine deıin qysqartý;
3. Jýrnalısterdiń quqyqtary men bostandyqtarynyń saqtalýy týraly ulttyq baıandamany daıyndaý.
4. Baspasóz kartasyn engizý;
5. Otandyq teleradıo habar taratatyn spýtnıktik operatorlardyń shyǵyndarynyń bir bóligin sýbsıdııalaý;
6. 2025 jyldan bastap respýblıkalyq deńgeıde granttyq qarjylandyrýǵa kóshý;
7. Buqaralyq aqparat quraldaryn esepke qoıý tetigin jetildirý;
8. Buqaralyq aqparat quraldarynyń qyzmetin ózin-ózi retteý máseleleri jónindegi qoǵamdyq-kásiptik keńester qurý.

Depýtattar da, mınıstr de talqylaýda aıtylǵan túıtkilder men usynystardy ekinshi oqylymǵa deıin pysyqtap, árqaısysy boıynsha ortaq sheshim qabyldaý týraly paıymǵa keldi.