Májilis MÁMS júıesin jetildirýge qatysty zań jobasyn birinshi oqylymda maquldady

ASTANA. KAZINFORM – Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine mindetti áleýmettik medıtsınalyq saqtandyrý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.

- Zań jobasynda jergilikti bıýdjet qarajaty esebinen jumyssyzdar men halyqtyń osal toby sanatyndaǵy adamdar úshin MÁMS jarnalaryn tóleý eskerilgen. Osy sharalardyń esebinen 2026 jyly MÁMS júıesimen qosymsha 1 mln-nan astam adam qamtylyp, josparly medıtsınalyq kómekke qol jetkizýge múmkindik berip, ulttyń jalpy densaýlyǵy men ál-aýqatyn arttyrady. Bul mehenızm jarnalardyń túsýine qaramastan, Qordyń tarapynan «D» jáne «E» sanattaryndaǵy adamdarǵa aı saıyn saqtandyrylǵan mártebesi beriledi. Osy adamdar úshin ákimdikterdiń tólemi medıtsınalyq kómekke júgingen sátten bastap jáne jyl aıaǵyna deıin júzege asyrylady. Atalǵan sanattaǵy adamdardy anyqtaý, saqtandyrylǵan mártebesin berý jáne saqtandyrý jarnalaryn tóleý mehanızmi pysyqtaldy, - dedi Densaýlyq saqtaý mınıstri Aqmaral Álnazarova. 

Budan bólek, MÁMS-ke memleket jarnalarynyń mólsherin ósirý eskerilgen.

Osy turǵyda 2027 jyldan bastap respýblıkalyq bıýdjet qarajaty esebinen tólenetin memlekettiń MÁMS-ke jarnalarynyń mólsherlemelerin birtindep arttyrý kózdelgen.

Osylaısha, 2015 jylǵy MÁMS týraly zańynyń birinshi redaktsııasynda qarastyrylǵan bastapqy qarjylyq úlgige ishinara qaıta oralý usynyldy. Búgin Májiliste qaralǵan zań jobasynda memlekettik jarnalardyń mólsherlemelerin 2027 jyldan bastap 2037 jylǵa deıin kezeń-kezeńimen 3 paıyzǵa (ár eki jyl saıyn 0,5%-dan) arttyrý kózdelgen, ıaǵnı 2 paıyzdan 5 paıyzǵa deıin. Qosymsha jınaqtalǵan qarajat densaýlyq saqtaý júıesiniń shyǵyndaryn MÁMS júıesi arqyly belgili bir deńgeıde qarjylandyrýdy qamtamasyz etedi.

- Eńbek jáne halyqty áleýmettik qorǵaý mınıstrligi Áleýmettik medıtsınalyq saqtandyrý qory jáne jergilikti atqarýshy organdarymen birlesip, óńirler boıynsha aqparattyq júıelerde saqtandyrý mártebesin alýǵa quqyǵy bar jáne medıtsınalyq qyzmetter alǵan adamdardyń tizimin qalyptastyryp, jarna tóleýdi qamtamasyz etý joldaryn pysyqtady. Osy oraıda «D» jáne «E» sanattary úshin jergilikti atqarýshy organdardyń esepteýiniń biryńǵaı obektisine toqtalyp óteıin. Óńirlerde ortasha aılyq jalaqy deńgeıiniń aıtarlyqtaı aıyrmashylyǵy bar. Mysaly, 2023 jyly Atyraý oblysy boıynsha ortasha aılyq jalaqy mólsheri 557 736 teńgeni qurasa, Soltústik Qazaqstan oblysy boıynsha 237 538 teńgeni qurady. Biryńǵaı respýblıkalyq ortasha aılyq jalaqy mólsherin qoldaný naqty kórinistiń burmalaýyna ákeledi dep esepteımiz. Bul jalaqysy tómen óńirlerde jergilikti bıýdjetterdiń artyq mindettemelerine, al ekonomıkasy joǵary deńgeıdegi óńirlerde tómen júktemege ákelýi múmkin. Osy jaǵdaı qarjylyq júktemeni bólýdiń obektıvtiligi men tepe-teńdik qaǵıdattaryn buzady. Osyǵan baılanysty óńirlik ortasha aılyq jalaqyny paıdalaný ádisi jergilikti halyqtyń ómir súrý jáne tabys deńgeıin dálirek eskerýge múmkindik beredi, - dedi A. Álnazarova.

Budan buryn habarlanǵandaı, 2026 jyly MÁMS júıesimen qosymsha 1 mln-nan astam adam qamtylady. 

Jaqynda MÁMS júıesinen tys qalǵan 3,3 mln adamnyń máselesi qalaı sheshiletinin jazǵan edik.