Májilis kúzet uıymdarynyń qolyndaǵy qarý-jaraq aınalymyn retteıtin zań jobasyn maquldady

ASTANA. KAZINFORM — Májilis zańnamaǵa kúzet qyzmeti máseleleri boıynsha ózgerister men tolyqtyrýlar engizýge arnalǵan zań jobasyn birinshi oqylymda maquldady.

— Zań jobasynda usynylyp otyrǵan norma boıynsha ýákiletti organ men onyń aýmaqtyq bólimsheleri kúzet qyzmeti men mamandandyrylǵan oqý ortalyqtarynyń qyzmetin tekserý arqyly baqylaıtyn bolady. ıAǵnı qoldanystaǵy kúzet uıymdarynyń jumysyn barmaı-aq baqylaý tetigi alynyp tastalady. Nysanǵa barmaı-aq tekserý tetigi tek kúzet dabylyn montajdap, baptaıtyn tehnıkalyq qyzmet uıymdaryna ǵana júrgiziledi, — dedi Jarqynbek Amantaıuly.

Zań jobasynyń ekinshi blogy qarý ıeleri men kúzet uıymdaryna qoıylatyn talaptardy kúsheıtýge baǵyttalǵan.

— Qarý ıeleri úshin jańa mindetter engizilip otyr. Endi qarý ıeleri — zańdy tulǵalar óz qyzmetin toqtata turǵan jaǵdaıda 15 jumys kúnniń ishinde qarý men onyń patrondaryn ishki ister organdaryna saqtaýǵa tapsyrýǵa mindetti bolady. Bul mindet azamattyq jáne qyzmettik qarýdy paıdalanýshylarǵa atys daıarlyǵy boıynsha praktıkalyq sabaqtar júrgizetin mamandandyrylǵan oqý ortalyqtarǵa da qatysty bolady. Osylaısha, bul norma qarýdy qylmystyq maqsatta paıdalanbaý jáne ulttyq qaýipsizdikke tónetin qaterdi bolǵyzbaý úshin engiziledi, — dedi depýtat.

Resmı málimet boıynsha, eldegi kúzet uıymdarynyń qolynda 22 myńnan astam qarý bar.