Májilis Qurylys kodeksine Senat engizgen túzetýlermen kelisti
ASTANA. KAZINFORM — Májilis Qurylys kodeksi men oǵan ilespe qujatqa Senat engizgen túzetýlerdi maquldady.
— Ózderińizge belgili, bul zań 2 jylǵa jýyq Parlamentte qaraldy. Óte ózekti zańnama. Bıylǵy jyldy aıtar bolsaq, eń mańyzdy zań dep aıtýǵa bolady. Sebebi, búkil qoǵamǵa qatysy bar. Bul zań jan-jaqty talqylandy. Ártúrli memlekettik organdarmen, uıymdarmen, qaýymdastyqtarmen, bıznes ókilderimen aqyldastyq. 2 200-den astam usynys berildi. Negizinen 60-70 paıyzy ózgertildi. Eń basty maqsat bul zań azamattardyń quqyǵyn qorǵaý kerek. Qaýipsizdik máselesi, qalanyń yńǵaıly bolýy kózdeldi, — dedi Májilis depýtaty Murat Ábenov.
Sonymen qatar ol Memleket basshysy da osy baǵytta tapsyrmalar bergenin eske saldy.
— Sol sebepti depýtattar kóp jaǵdaıda qoǵammen aqyldasyp, birinshi kezekte sapaǵa mán berdi. Normalardyń bárin jiberdik. Senat qarady, jan-jaqty talqyladyq. Biraz máseleni aqyldastyq. Senat negizgi zań boıynsha 27, ilespe zań boıynsha 2 usynys berdi. Negizinen bul usynystardyń biri naqtylaý jáne jaqsartý dep qaraımyz, — dedi ol.
Aıta keteıik, ótken aptadaǵy Senat otyrysynda depýtattar Qurylys kodeksiniń jáne ilespe qujattyń jekelegen baptaryn maquldamaı jańa normalarmen tolyqtyrý arqyly Májiliske qaıtardy. Sol kezde senator Súıindik Aldashev Zańnan sáýlet, qala qurylysy jáne qurylys isteri jónindegi ýákiletti organnyń quzyretinen respýblıkalyq mańyzy bar qalalardyń, astananyń jáne oblystardyń bas sáýletshilerin taǵaıyndaýdy kelisý jónindegi norma, Jer kodeksine sáıkestendirý maqsatynda aýdandar ákimdikteriniń quzyretinen jer ýchaskelerin berý quqyǵy alyp tastalǵanyn aıtty.
— Qurylys obektileri boıynsha jobalaý-smetalyq qujattamany ázirleý protsesin uıymdastyrý memlekettik ınvestıtsııalar esebinen qarjylandyrylatyn qurylys obektileri úshin mindetti bolyp tabylatyn «bir tereze» qaǵıdaty boıynsha jobalardy ázirleý men saraptaýdy uıymdastyrýǵa arnalǵan portalda júzege asyrylady. Sondaı-aq jeke turǵyn úı qurylysy aýmaǵynda áleýmettik, kólik jáne ınjenerlik ınfraqurylym obektilerin salý men paıdalanýdy qarjylandyrý jónindegi paıdalanýshynyń mindetin alyp tastaýdy kózdeıtin ózgeris engiziledi. Buǵan qosa, merdigerdiń (bas merdigerdiń) menshik ıesimen teń dárejede qurylys obektisin paıdalanýdan keıingi kezeńge (buzýǵa) qatysty sheshim qabyldaý quqyǵyn kózdeıtin norma alynyp tastalady, óıtkeni merdigerdiń qoldanystaǵy zańnamaǵa sáıkes mundaı sheshimder qabyldaýǵa zańdy negizderi joq, — dedi ol.