Májilis Qurylys kodeksin qabyldady
ASTANA. KAZINFORM — Búgin Májilistiń jalpy otyrysynda elimizdiń Qurylys kodeksi, «Qazaqstan Respýblıkasynyń keıbir zańnamalyq aktilerine sáýlet, qala qurylysy jáne qurylys máseleleri boıynsha ózgerister men tolyqtyrýlar engizý týraly» zańnyń jobasy ekinshi oqylymda qabyldandy.
— Qurylys kodeksiniń jobasy qurylys salasynda týyndaǵan júıelik problemalardy sheshýge baǵyttalǵan jáne adamnyń tynys-tirshiligi úshin qolaıly, qaýipsiz ortany qamtamasyz etýdi, qurylys salasynyń barlyq sýbektisiniń quzyreti men jaýapkershiligin arttyrýdy, sáýlet sheshimderi men qala qurylysy qujattamasyn talqylaýǵa jurtshylyqtyń qatysýyn, sáýlet, qala qurylysy jáne qurylys qyzmetinde jiberilgen buzýshylyqtarǵa ýaqtyly den qoıýdy, seısmıkalyq aımaqtarda jobalaý jáne qurylys salý erekshelikterin engizýdi kózdeıdi, — dedi qujattar boıynsha negizgi baıandama jasaǵan depýtat Murat Ábenov.
Onyń aıtýynsha, biryńǵaı qala qurylysy saıasatyn iske asyrý jónindegi is-qımyldardy úılestirý úshin qala qurylysy keńesteri qurylady. Qala qurylysyn josparlaý kezinde máslıhattardyń róli kúsheıtiledi. Eldi mekenniń bas josparyn, Respýblıka aýmaǵyn uıymdastyrýdyń bas shemasyn ázirleý merzimi 20 jylǵa deıin bekitiledi. Seısmıkalyq qaýipti aýmaqtarda qurylysqa qoıylatyn talaptar qatańdatylady. Seısmıkalyq mıkroaımaqtandyrý kartalary, qaýipti ýchaskelerdiń sel jáne kóshkin kartalary mindetti esepke alynady.
Sondaı-aq bir sýbektiniń «tolyq aıaqtalǵan» qurylysyn iske asyrý úshin «tehnıkalyq tapsyrys berýshi» ınstıtýty engiziledi. Tıisti ınjenerlik izdestirýlerdi oryndamaı jobalyq qujattamany daıyndaýǵa jáne obektilerdiń qurylysyn salýǵa tyıym salynady. Sáýlet, qala qurylysy jáne qurylys qyzmeti salasyndaǵy protsester tsıfrlandyrylady. Qurylys obektilerin josparly túrde ınspektsııalaý engiziledi. Memlekettik sáýlet-qurylys baqylaý organdary obektilerdi paıdalanýǵa qabyldaýǵa qatysady. Obektilerdi paıdalanýǵa qabyldaý kezinde órtke qarsy baqylaý engiziledi.
— Qurylys obektileriniń kepildik merzimi kóterýshi konstrýktsııalarǵa, shatyrǵa, qasbetterge jáne syrtqy qabyrǵaǵa on jylǵa deıin, qurylys obektisine bes jylǵa deıin uzartylady. Sondaı-aq depýtattardyń bastamasymen elordanyń aýmaqtyq, kóliktik jáne qala qurylysy josparlaýyn ıntegratsııalaý boıynsha túzetýler qabyldandy. Bul kóshe ótkizý qabileti men jol qozǵalysy qaýipsizdigin eskere otyryp, kóliktik josparlaýdy jaqsartýǵa múmkindik beredi. Budan basqa, ilespe zań jobasy aıasynda depýtattar áleýmettik obektilerdi, sondaı-aq turǵyn úı qoryn jańartý úshin avarııalyq jáne tozyǵy jetken qurylys obektilerin qaıta jańartý jóninde túzetýler engizdi, — dedi Murat Ábenov.
Aıta keteıik, Májilis jedel járdem qyzmetkerlerin qorǵaýǵa arnalǵan qujatty da maquldady.