Qoǵamdyq orynda bet-júzin tanýǵa kedergi keltiretin zattardy qoldanýǵa tyıym salyndy – Parlament
ASTANA. KAZINFORM – Parlament Májilisi quqyq qorǵaý qyzmetin jetildirý, quqyq qorǵaý men azamattyq qorǵaý organdarynyń qyzmetkerlerin jáne áskerı qyzmetshilerdi turǵyn úımen qamtamasyz etýge qatysty zańyna Senattyń jańa redaktsııada usynǵan jekelegen baptarymen kelisti.
Zańnyń maqsaty - memlekettik organdar jumysynyń tıimdiligin arttyrý, zań men tártip qaǵıdasyn ilgerletý, ishki ister organdarynyń qyzmetindegi artyq zańnamalyq reglamentteýdi bolǵyzbaý, quqyq qorǵaý, arnaýly memlekettik, azamattyq qorǵaý organdary qyzmetkerleri men áskerı qyzmetshilerdi, turǵyn úımen qamtamasyz etý jáne áleýmettik qorǵaýdyń tetigin jetildirý úshin qoldanystaǵy zańdarǵa ózgerister men tolyqtyrýlar jasaý.
Zańda Іshki ister mınıstrliginiń jumysyn ońtaılandyrý eskerilip, «Jergilikti polıtsııa qyzmeti» ınstıtýtynyń ornyna profılaktıka men qoǵamdyq qaýipsizdik basqarmalary qurylady. Bul ózgerister, jańa syn-qaterlerge jedel tosqaýyl qoıýǵa, zań men tártip qaǵıdasyn tıimdi iske asyrýdy qamtamasyz etýge múmkindik beredi. Іshki ister organdaryna qosymsha ókilettilik berý arqyly, qos azamattyqty azaıtýǵa jáne azamattyqtan shyǵýshylar úshin yńǵaıly tetikter jasalady.
«Daktıloskopııalyq jáne genomdyq tirkeý týraly» Zańǵa engizilgen ózgerister negizinde, Daktıloskopııalyq jáne genomdyq tirkeýdiń eriktilik qaǵıdasy jáne tulǵany verıfıkatsııalaýdyń zańnamalyq anyqtamasy engiziledi. Genomdyq jáne daktotirkeý aqparattar bazasyn qorǵaý mehanızmderi men daktotirkeýden bosatylatyn tulǵalar tizimi anyqtalady.
Budan bólek, quqyq qorǵaý organdarynyń áleýmettik jaǵdaıyn jaqsartý normalary eskerilgen. Kúsh qurylymdarynyń qyzmetkerleri men áskerı qyzmetshilerdi, olardyń otbasy múshelerin áleýmettik qoldaý sharalary kúsheıtiledi. Endigi jerde, Turǵyn úı tólemderin alýshylardyń qataryna azamattyq qorǵaý organdarynyń, qarjy monıtorıngi agenttiginiń jáne prokýratýranyń qyzmetkerleri qosylady.
Munymen qosa osy zań aıasynda bet-álpetti tanýǵa kedergi keltirýge tyıym salý normalary engizildi.
«Quqyq buzýshylyqtyń aldyn alý týraly» Zańǵa qyzmettik nemese eńbek mindetterin atqarý, medıtsınalyq maqsattarda, aýa raıy jaǵdaılaryn qospaǵanda, bet-álpetti tanýǵa kedergi keltiretin kıim-keshekti qoǵamdyq oryndarda kıip júrýge tyıym salý týraly norma qamtyldy. Bul shara bet-álpetti tanýdyń múmkindikterin jetildirý arqyly, qoǵamdyq oryndarda jasalatyn quqyq buzýshylyqtardyń, qylmystardyń aldyn alýdyń tıimdiligin arttyrady.
- Qaralyp otyrǵan zańdy Parlament Májilisi bıylǵy 28 mamyrda ekinshi oqylymda qabyldady jáne ol Senattyń qaraýyna jiberildi. Parlament Senaty engizgen ózgerister zańnyń tujyrymdamalyq erejelerin ózgertpeıdi. Osy oraıda Májilistiń Zańnama jáne sot-quqyqtyq reforma komıteti Senattyń zańdaǵy jekelegen baptardyń jańa redaktsııasymen kelisýdi usynady, - dedi Jarqynbek Amantaıuly Májilistiń jalpy otyrysynda.
Palata depýtattary atalǵan usynysqa qoldaý bildirdi.
Budan buryn habarlanǵandaı, bıyl 19 maýsymda Senat quqyq qorǵaý qyzmetkerlerin baspanamen qamtamasyz etý qujatyn Májiliske qaıtardy.
Atap aıtqanda, zańdy Parlament Senatynda qaraý barysynda senatorlar tıisti túzetýler engizdi.
Zańdy qaraý barysynda týyndaǵan jáne ony jetildirýdi kózdeıtin myna ózgertýler eskerilgen:
- Zańnyń 1-baby 3-tarmaǵy 10) tarmaqshasynyń jıyrma úshinshi abzatsynda («Turǵyn úı qatynastary týraly» QR Zańynyń 101-4-baby 1-tarmaǵynyń úshinshi bóligi) quqyq qorǵaý, arnaýly memlekettik organdardyń, azamattyq qorǵaý organdarynyń qyzmetkerlerine jáne áskerı qyzmetshilerge turǵyn úı tólemderiniń mólsherin esepteý kezinde QR Úkimetiniń turǵynjaıdyń shekti aýdanyn aıqyndaý jónindegi quzyretin bekitý bóliginde ózgeris engizý usynyldy. - Sonymen qatar, osy ózgeristerge sáıkestendirýge baılanysty, birneshe redaktsııalyq sıpattaǵy túzetýler («Turǵyn úı qatynastary týraly» QR Zańynyń 101-4-baby 1-tarmaǵynyń úshinshi bóligi) kózdeledi.
Jaqynda Іshki ister mınıstriniń orynbasary Sanjar Ádilov bet-júzin búrkemelegenderge nege jaza qoldanylmaıtynyn túsindirdi.