Májilis qorshaǵan ortany qorǵaýdy kúsheıtetin Zańdy qabyldady
ASTANA. KAZINFORM — Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine ekologııalyq máseleler boıynsha ózgerister men tolyqtyrýlar engizý týraly» Zań qabyldandy.
Qujat boıynsha negizgi baıandama jasaǵan depýtaty Ajar Saǵandyqovanyń aıtýynsha, zań jobasynda ishki kómirtek naryǵyn damytýǵa baǵyttalǵan túzetýler qarastyrylǵan. Atap aıtqanda, taýar bırjasy arqyly kvotalardy bólýdiń aýktsıondyq tetigin engizý josparlanýda, bul naryqtyq baǵa qalyptastyrýdy jáne júıeniń ashyqtyǵyn arttyrýdy qamtamasyz etedi. Sondaı-aq kómirtek birlikterine suranys pen usynys arasyndaǵy yqtımal teńgerimsizdikterdi retteýge múmkindik beretin turaqtandyrý rezervin qurý kózdeledi.
— Sonymen qatar, halyqaralyq kómirtekti retteýdiń artyp kele jatqan rólin eskere otyryp, Parıj kelisiminiń 6-babynyń normalaryn ımplementatsııalaý boıynsha túzetýler usynylady. Jańa zań normalary gıdrometeorologııa salasyndaǵy ǵylymı qyzmetti damytýǵa múmkindik beredi. Onyń ishinde qoldanbaly mindetterdi sheshý: ekonomıkanyń túrli salalary úshin zamanaýı tehnologııalardy damytý, boljamdyq modelderdi beıimdeý, ǵylymı zertteýler júrgizý jáne basqa da ózekti mindetter. Gıdrometeorologııany damytý — bul ulttyq qaýipsizdik, ekonomıka jáne halyqty qorǵaý máselesi. Avtomattandyrylǵan júıelerdi engizý jáne klımattyq saıasatty damytý elge klımat ózgeristerine tıimdi beıimdelýge múmkindik beredi, bul qaýipsizdik pen ekonomıkanyń turaqty damýyn qamtamasyz etedi, — dedi ol.
Depýtat turaqty organıkalyq lastaýshylardy jáne ıesiz qaýipti qaldyqtardy joıýdy qarjylandyrý boıynsha qajetti quzyretter berý jolymen «Jasyl damý» AQ qyzmetin retteý usynylatynyn atap ótti.
— Zań jobasynda jekelegen kezeńderdi ońtaılandyrý arqyly ınvestıtsııalyq jobalar jáne kómirsýtekterdi barlaý jóninde jobalar úshin rásimderdi jeńildetý kózdelgen. Bul ózgerister teńizdegi kómirsýtekterdi barlaýǵa qoldanylmaıdy, munda qatań ekologııalyq rejım saqtalady. Zań jobasyn qabyldaý ekologııalyq retteýdiń tıimdiligin arttyrýǵa, táýekelge baǵdarlanǵan baqylaýdy engizýge, bızneske ákimshilik júktemeni azaıtýǵa, quqyqtyq olqylyqtar men qaıshylyqtardy joıýǵa, qorshaǵan ortany qorǵaýdy kúsheıtýge jáne Qazaqstan Respýblıkasynyń ınvestıtsııalyq tartymdylyǵyn arttyrýǵa múmkindik beredi, - dedi Ajar Saǵandyqova.
Aıta keteıik, búgin Májilistiń jalpy otyrysynda QR Úkimetiniń jáne Joǵary aýdıtorlyq palatanyń 2025 jylǵy respýblıkalyq bıýdjettiń atqarylýy týraly esebi talqylandy.
