Májilis qoǵamdyq birlestikter men shahterlerge arnalǵan tólem týraly zańdy qabyldady
Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine qoǵamdyq birlestikter jáne eńbek jaǵdaılary zııandy jumystarda isteıtin adamdardy áleýmettik qorǵaý máseleleri boıynsha ózgerister men tolyqtyrýlar engizý týraly» Zańy ekinshi oqylymda qabyldandy, dep habarlaıdy Kazinform.
Bul qujat Májiliste bıyl 8 qarashada birinshi oqylymda maquldanǵan edi.
Jalpy, zań úsh quryltaıshymen qoǵamdyq birlestik qurýǵa múmkindik beredi. Bul qujatta qoldanystaǵy zańnamanyń normalaryna sáıkes keltirý, atap aıtqanda respýblıkalyq mańyzy bar qalalardyń qoǵamdyq birlestiginiń mártebesin aıqyndaý, sondaı-aq qoǵamdyq birlestikter qurý máselelerin quqyqtyq retteý jáne basqalaryna baǵyttalǵan normalar usynyldy.
«Sonymen qatar, Memleket basshysynyń Joldaýyn oryndaý úshin Úkimet zań jobasyna eńbek jaǵdaılary zııandy jumystarmen baılanysty adamdardy áleýmettik qorǵaýǵa baǵyttalǵan birqatar túzetý engizýdi usynǵan. Osyǵan saı depýtattar Áleýmettik kodekske arnaıy áleýmettik tólem engizý jónindegi normalar engizdi. Bul tólem qyzmetker 55 jasqa tolǵan bolsa, keminde 84 aı mindetti kásiptik zeınetaqy jarnalary tólengen bolsa jáne azamat zııandy jumystardaǵy qyzmetin toqtatqan kezde júzege asady», – dedi depýtat Nartaı Sársenǵalıev.
Áleýmettik tólem mynandaı negizgi baǵyttardan quralady:
- respýblıkalyq bıýdjetten beriletin arnaýly kásiptik memlekettik járdemaqy 2 eń tómengi kúnkóris deńgeıi mólsherinde;
- jumys berýshiniń qarajaty esebinen kásibı tólemniń 1 eń tómengi kúnkóris deńgeıi mólsherinde;
- saqtandyrý uıymdarynan zeınetaqy aldyndaǵy annýıtet sharty boıynsha 1 eń tómengi kúnkóris deńgeıi mólsherinde saqtandyrý tóleminen;
- Biryńǵaı jınaqtaýshy zeınetaqy qorynan mindetti kásiptik zeınetaqy jarnalary esebinen qalyptastyrylǵan zeınetaqy tóleminen turady.
Depýtat atap ótkendeı, zııandy jumysta isteıtin azamat mindetti zeınetaqy jarnalary esebinen zeınetaqy jınaqtaryn 55 jasta nemese 63 jasta altynyn ózi sheshedi.
«Eńbek jaǵdaılary zııandy jumystarmen baılanysty azamat «arnaıy áleýmettik tólem alyp zııandy jumystan ketemin deı me, álde ári qaraı qyzmet ete beremin deı me» ózi sheshedi. Arnaıy áleýmettik tólem zeınetkerlik jasqa tolǵanǵa deıin júrgiziledi», – dedi N.Sársenǵalıev.
Buǵan qosa, azamatty qyzmettik mindetterin oryndaý kezindegi jazataıym oqıǵalardan qorǵaý úshin, mindetti saqtandyrý júıesin jetildirý jónindegi normalar usynyldy. Adam densaýlyǵyna zııany bar óndiristi júzege asyratyn kompanııa saqtandyrý kompanııasyna belgili bir mólsherde tólem jasaıdy. Saqtandyrý kompanııasy sol qarjynyń 6 paıyzyn jumys berýshige qaıtarýy tıis. Ol qarajat qyzmetkerlerdiń eńbek jaǵdaıyn jaqsartýǵa jumsalady. Saqtandyrý uıymdary eńbek jaǵdaıynda zardap shekken qyzmetkerdiń shıpajaıdaǵy emin tóleýge tıis. Ol 100 AEK-ten aspaýy kerek.
«Jazataıym oqıǵa saldarynan jaralanǵan qyzmetkerdiń kinási saqtandyrý tólemin jasaý kezinde qarastyrylmaıdy. Bul – óte mańyzdy norma. Sondaı-aq, óndiriste zardap shekken adamdardyń jekelegen sanattaryn áleýmettik qoldaý boıynsha normalar usynyldy», - dedi depýtat.
Osy qujat aıasynda qaralatyn máseleler salasynyń keńeıýin eskere otyryp, depýtattar zańnyń taqyrybyn «Qazaqstan Respýblıkasynyń keıbir zańnamalyq aktilerine qoǵamdyq birlestikter jáne eńbek jaǵdaılary zııandy jumystarda isteıtin adamdardy áleýmettik qorǵaý máseleleri boıynsha ózgerister men tolyqtyrýlar engizý týraly» dep ózgertý jóninde usynys engizdi.
Talqylaýdan keıin palata depýtattary osy zańdy qabyldady.
Budan buryn habarlanǵandaı, 55 jasqa tolǵan shahterlerge tólenetin áleýmettik tólemniń somasy belgili boldy.
