Májilis Qyrǵyzstannyń qosylýyna baılanysty EAEO shartyna ózgeristerdi ratıfıkatsııalady
Búgin Májilistiń jalpy otyrysynda Qyrǵyz Respýblıkasynyń qosylýyna baılanysty Eýrazııalyq ekonomıkalyq odaq týraly shartqa engizilgen ózgeristerdi ratıfıkatsııalady, dep habarlaıdy Kazinform.
«Sizderdiń qaraýlaryńyzǵa «2014 jylǵy 29 mamyrdaǵy Eýrazııalyq ekonomıkalyq odaq týraly shartqa Qyrǵyz Respýblıkasynyń qosylýyna baılanysty Qyrǵyz Respýblıkasynyń 2014 jylǵy 29 mamyrdaǵy Eýrazııalyq ekonomıkalyq odaq týraly shartty, Eýrazııalyq ekonomıkalyq odaqtyń quqyǵyna kiretin jekelegen halyqaralyq sharttardy jáne Eýrazııalyq ekonomıkalyq odaq organdarynyń aktilerin qoldanýy jónindegi jaǵdaılar men ótpeli erejeler týraly 2015 jylǵy 8 mamyrda qol qoıylǵan hattamaǵa ózgeris engizý týraly hattamany ratıfıkatsııalaý týraly» Qazaqstan Respýblıkasy Zańynyń jobasy engiziledi», - dedi zań jobasyn tanystyrǵan Úkimet basshysynyń orynbasary – Qarjy mınıstri Erulan Jamaýbaev.
Onyń atap ótýinshe, Qyrǵyz Respýblıkasy Eýrazııalyq ekonomıkalyq odaqqa óziniń qosylýy jónindegi ótpeli erejelerge sáıkes, 24 aı ishinde odaqtyń kedendik shekarasyndaǵy Qyrǵyz Respýblıkasynyń barlyq ótkizý pýnktterin jaılastyrýdy jáne materıaldyq-tehnıkalyq jaraqtandyrýdy qamtamasyz etýdi mindetine aldy.
«Bul rette, Hattama úsh ret uzartyldy. Degenmen, Qyrǵyz Respýblıkasy kórsetilgen merzimderde de oryndamady. Sondyqtan 2023 jylǵy 25 mamyrda Máskeý qalasynda Memleket basshylary Joǵary Eýrazııalyq ekonomıkalyq keńestiń otyrysy sheńberinde tórtinshi ret «96 aıdan» «108 aıǵa» ózgeris engizý týraly hattamaǵa qol qoıdy, ıaǵnı 2024 jylǵy 12 tamyzǵa deıin uzartylady. Qazirgi tańda 13 ótkizý pýnkti tolyǵymen jańǵyrtyldy. Biraq qyrǵyz-tájik shekarasyndaǵy 1 ótkizý pýnkti boıynsha jumys aıaqtalǵan joq», - dedi ol.
Erulan Jamaýbaevtyń atap ótýinshe, hattamany ratıfıkatsııalaý elimiz úshin áleýmettik-ekonomıkalyq jáne quqyqtyq saldarǵa ákep soqpaıdy jáne respýblıkalyq bıýdjetten qarajat bólýdi talap etpeıdi.
