Májilis Kıprmen arada sottalǵan adamdardy berýge qatysty zańdy qabyldady

ASTANA. KAZINFORM — Búgin Parlament Májilisiniń jalpy otyrysynda «Qazaqstan Respýblıkasy men Kıpr Respýblıkasy arasyndaǵy sottalǵan adamdardy berý týraly kelisimdi ratıfıkatsııalaý týraly» Zańy qabyldandy.

Түрме
Фото: Kazinform

Kelisimge 2024 jylǵy 25 naýryzda Astana qalasynda qol qoıyldy.

— Eske salsaq, buǵan deıin Kıprmen arada quqyqtyq kómek jáne ustap berý týraly kelisimshartty ratıfıkatsııaladyq. Osy oraıda búgin qaralyp otyrǵan kelisim arqyly Kıprmen qylmystyq is júrgizý salasy boıynsha tolyqqandy quqyqtyq bazany qalyptastyramyz. Bul qujattyń mańyzy zor. Áleýmettik turǵydan qarasaq, shetelde sottalǵan Qazaqstan azamattaryn elimizge ákelýge, týystarynan qol úzdirmeı, qoǵamǵa tez beıimdelýge oń yqpal etedi, — dedi QR Bas prokýrorynyń orynbasary Ǵalymjan Qoıgeldıev.

Onyń aıtýynsha, keıingi jyldary Kıprmen arada qarym-qatynas qarqyndy túrde damyp keledi. Sonyń ishinde saýda-ekonomıkalyq, bıznes, týrıstik salalar qamtylǵan.

— Kıprde otandasymyz qandaı da bir quqyq buzyp, sottalsa, onda osy qujat aıasynda onyń qalǵan ýaqytyn Qazaqstanda óteýge múmkindik jasalady, — dedi Bas prokýrordyń orynbasary.

Atap aıtqanda, sottalǵan adamdardy berý úshin úsh negizgi shart saqtalýy tıis:

— sottalǵan adamnyń eki eldiń bireýiniń azamattyǵy bolýy tıis;
— sottalǵan adamnyń berý týraly erikti kelisiminiń bolýy;
— sottalǵan adamnyń is-áreketi eki elde de qylmys dep tanylýǵa tıis.

Berýden bas tartý myna sebepter boıynsha múmkin:

— eger Úkim shyǵarýshy tarap berýdi óziniń ulttyq qaýipsizdigine qater tóndirýi múmkin dep eseptese;
— sottalǵan adam úkim boıynsha zalaldy ótemese;
— Úkim shyǵarýshy tarapta sottalǵan adamǵa qatysty qylmystyq qýdalaý júzege asyrylsa.

Eske salsaq, byltyr naýryz aıynda Astanada Kıpr Syrtqy ister mınıstriniń Qazaqstanǵa resmı sapary aıasynda Qazaqstan Respýblıkasy men Kıpr Respýblıkasy arasyndaǵy sottalǵan adamdardy berý týraly kelisimge qol qoıý rásimi ótti.

Сейчас читают