Májilis Qazaqstan men Túrikmenstannyń qylmyspen birlesip kúresý týraly qujatty qabyldady

ASTANA. KAZINFORM — Búgin Májilistiń jalpy otyrysynda «Qazaqstan Úkimeti men Túrikmenstan Úkimeti arasyndaǵy qylmyskerlikke qarsy kúrestegi yntymaqtastyq týraly kelisimdi ratıfıkatsııalaý týraly» Zańy qabyldandy. 

Kelisimge byltyr 10 qazanda Memleket basshysynyń Túrikmenstanǵa sapary barysynda qol qoıyldy. Ol qylmysqa qarsy kúres salasyndaǵy ekijaqty yntymaqtastyqtyń quqyqtyq negizin qurady.

— Qujatta aqparattyq tehnologııalar men aqparattyq qaýipsizdik, terrorıstik jáne ekstremıstik qylmystar, uıymdasqan qylmysqa qarsy kúres, esirtkiniń zańsyz aınalymy, sondaı-aq zańsyz kóshi-qon jáne adam saýdasy salasynda eki eldiń quzyretti organdarynyń qarym-qatynasyn damytý eskerilgen. Kelisim halyqaralyq sharttarǵa jáne Qazaqstan Respýblıkasynyń zańnamasyna sáıkes keledi, — dedi QR Іshki ister mınıstriniń orynbasary Sanjar Ádilov.

Onyń aıtýynsha, qazirgi ýaqytta osyndaı kelisimder 20 elmen (Bolgarııa, Majarstan, Iordanııa, Ispanııa, Italııa, Saýd Arabııasy, Qytaı, Lıtva Respýblıkasy, Latvııa, Polsha, Rýmynııa, Slovakııa, Serbııa, Túrkııa, Ózbekstan, Frantsııa, Cheh Respýblıkasy, Estonııa, BAÁ) jasalyp, kúshine endi.

Eske salsaq, jaqynda QR Parlamentiniń Senaty Qazaqstan men Túrikmenstannyń strategııalyq áriptestigin nyǵaıtatyn kelisimdi ratıfıkatsııalady.