Májilis Qazaqstan men Perý arasyndaǵy yntamaqtastyqqa qatysty úsh qujatty qabyldady
ASTANA. KAZINFORM – Búgin Parlament Májilisiniń jalpy otyrysynda Qazaqstan men Perý Respýblıkasynyń yntymaqtastyǵyna boıynsha úsh zań qabyldandy.
Birinshi qabyldanǵany - «Qazaqstan men Perý arasyndaǵy qylmystyq ister boıynsha ózara quqyqtyq kómek týraly shartty ratıfıkatsııalaý týraly» Zańy. Sharttyń negizgi maqsaty – taraptardyń ózara yntymaqtastyǵy men qylmystyq ister boıynsha ózara quqyqtyq kómek arqyly qylmystyń aldyn alý, tergeý, qylmystyq qýdalaý jáne jolyn kesý tıimdiligin arttyrý.
Májilistiń Zańnama jáne sot-quqyqtyq reforma komıtetiniń málimetinshe, qujat aıasynda ózara quqyqtyq kómek aqparat berýdi, adamdardy anyqtaýdy, izdestirýdi, tintýdi jáne jaýap alýdy, saraptama júrgizýdi, dáleldemeler berýdi, sondaı-aq taraptardyń ulttyq zańnamalarynda kózdelgen kómektiń basqa da nysandaryn qosa alǵanda, birqatar sharany iske asyrýdy kózdeıdi.
Sonymen qatar Májilis «Qazaqstan men Perý arasyndaǵy sottalǵan adamdardy berý týraly shartty ratıfıkatsııalaý týraly» Zańyn qabyldady.
Sharttyń negizgi maqsaty – bas bostandyǵynan aıyrýǵa sottalǵan adamdardy ózderi azamattary sanalatyn memlekette jazasyn óteý úshin berý tártibi men sharttaryn aıqyndaý máselelerinde tıimdi yntymaqtastyq ornatý. Qujat boıynsha bir taraptyń aýmaǵynda sottalǵan adam belgilengen jazany óteý úshin ekinshi taraptyń aýmaǵyna berilýi múmkin.
Munymen qosa, qabyldanǵan úshinshi qujat - «Qazaqstan men Perý arasyndaǵy ustap berý týraly shartty ratıfıkatsııalaý týraly» Zańy.
Shart taraptardyń aýmaǵynda júrgen, ustap berýge alyp keletin qylmystary úshin qylmystyq qýdalaý maqsatynda nemese sottyń zańdy kúshine engen úkimin oryndaý úshin izdeýde júrgen kez kelgen adamdy ustap berý bóliginde memleketter arasyndaǵy yntymaqtastyqty ornatýǵa baǵyttalǵan. Qujatta adamdardy ustap berýdiń jáne odan bas tartýdyń naqty negizderi qarastyrylady.
Eske salsaq, byltyr kúzde Senat «Qazaqstan Respýblıkasy men Marokko Koroldigi arasyndaǵy sottalǵan adamdardy berý týraly kelisimdi ratıfıkatsııalaý týraly» Zańdy maquldady.