Májilis Qazaqstan men Ózbekstannyń yntymaqtastyǵyn nyǵaıtýǵa arnalǵan qujatty qabyldady
ASTANA. KAZINFORM – Búgin Májilistiń jalpy otyrysynda «Qazaqstan Respýblıkasy men Ózbekstan Respýblıkasy arasyndaǵy odaqtastyq qatynastar týraly shartty ratıfıkatsııalaý týraly» zań jobasy qabyldandy.
Atalǵan qujatqa 2022 jylǵy 22 jeltoqsanda Tashkentte qol qoıyldy.
Sharttyń maqsaty - qazaq-ózbek qatynastaryn ózara is-qımyl men ekijaqty yntymaqtastyqtyń jańa deńgeıine kóterý, sondaı-aq eki memlekettiń táýelsizdigin, egemendigin, aýmaqtyq tutastyǵyn jáne turaqty ekonomıkalyq damýyn odan ári nyǵaıtýǵa járdemdesý.
«Sharttyń 1-babyna sáıkes Qazaqstan Respýblıkasy men Ózbekstan Respýblıkasy jan-jaqty yntymaqtastyq, senim, teńdik jáne ulttyq múddelerdi ózara eskerý, táýelsizdikti, egemendikti, aýmaqtyq tutastyqty jáne memlekettik shekaralardyń myzǵymastyǵyn ózara qurmetteý, sondaı-aq ózara mindettemelerdi adal oryndaý negizinde uzaq merzimdi odaqtastyq qatynastardy qurady jáne damytady. Qujattyń negizinde Taraptar qandaı da bir bloktarǵa nemese odaqtarǵa qatyspaý mindettemesin rastaıdy jáne basqa Tarapqa baǵyttalǵan qandaı da bir is-áreketterge qatysýdan tartynady», - delingen Májilistiń Halyqaralyq ister, qorǵanys jáne qaýipsizdik komıtetiniń málimetinde.
Sharttyń 4-babyna sáıkes Qazaqstan-Ózbekstan kópqyrly yntymaqtastyǵyn baýyrlastyq, odaqtastyq jáne strategııalyq áriptestik rýhynda odan ári nyǵaıtý maqsatynda Taraptar memleket basshylary basqaratyn Joǵary memleketaralyq keńesti qurdy, ol odaqtastyq qatynastardy damytýdyń strategııalyq baǵyttaryn aıqyndaıdy jáne Taraptardyń ortaq múddelerine baılanysty barynsha mańyzdy máselelerdi qaraıdy.
Taraptar qujat aıasynda eki memlekettiń parlamentteri, saıası partııalary men qoǵamdyq uıymdary arasyndaǵy baılanystardy nyǵaıtýǵa, óńirlik qaqtyǵystardy beıbit jolmen jáne halyqaralyq quqyqtyń jalpyǵa birdeı tanylǵan normalary jáne eń aldymen egemendikti, aýmaqtyq tutastyqty jáne memleket shekaralarynyń myzǵymastyǵyn qamtamasyz etý jáne saqtaý negizinde kelissózder júrgizý jolymen retteýge, sondaı-aq Birikken Ulttar Uıymynyń basty rólin nyǵaıtýǵa járdemdesedi.
Shart sheńberinde Taraptar ózara ekonomıkalyq kooperatsııany tereńdetý, saýda aınalymyn, ınvestıtsııalyq qyzmetti, kásipkerlik jáne ózge de sharýashylyq qyzmetti nyǵaıtý jáne ulǵaıtý, ózara baılanysty kólik júıesin damytý, eki el halyqtarynyń rýhanı jáne mádenı jaqyndyǵyn saqtaý, ǵylym, bilim, medıtsına, sport, mádenıet, týrızm, aqparat almasý salasyndaǵy ózara baılanystardy tereńdetý úshin qolaıly jaǵdaılar jasaıdy.
Osy qujat boıynsha Taraptar ekologııa jáne azyq-túlik qaýipsizdigin qamtamasyz etý maqsatynda energetıka salasynda, sondaı-aq óz aýmaǵynda ekinshi Taraptyń zańdy jáne jeke tulǵalarynyń menshik quqyǵy men múlkin qorǵaý máselesinde teń quqyqtylyq pen ózara tıimdi qatynastar negizinde yntymaqtastyqty jalǵastyrady. Sonymen qatar, Shartta Taraptar transshekaralyq sý resýrstaryn utymdy paıdalaný jáne sý sharýashylyǵy qurylystaryn paıdalaný, sý únemdeý tehnologııalaryn engizý jóninde sharalar qabyldaıtyn erejeler kózdelgen.
Sharttyń 23-babyna sáıkes Taraptar arasynda týyndaıtyn kelispeýshilikter kelissózder men konsýltatsııalar arqyly sheshiledi.
