Májilis Qazaqstan men Mońǵolııanyń zeınetaqy yntymaqtastyǵy jónindegi qujatty qabyldady
ASTANA. KAZINFORM — Búgin Májilistiń jalpy otyrysynda «Qazaqstan Úkimeti men Mońǵolııa Úkimeti arasyndaǵy zeınetaqy salasyndaǵy yntymaqtastyq týraly kelisimdi ratıfıkatsııalaý týraly» zań maquldandy.
Zań jobasynyń maqsaty — 2024 jylǵy 29 qazanda Ulan-Batyr qalasynda qol qoıylǵan Qazaqstan Úkimeti men Mońǵolııa Úkimeti arasyndaǵy zeınetaqy salasyndaǵy yntymaqtastyq týraly kelisimdi ratıfıkatsııalaý.
Májilistiń Áleýmettik-mádenı damý komıtetiniń málimetine qaraǵanda, atalǵan kelisimdi ratıfıkatsııalaý eki el azamattarynyń zeınetaqymen qamsyzdandyrý salasyndaǵy quqyqtaryn qamtamasyz etýge baǵyttalǵan.
Bul turǵyda, ol zeınetaqy tólemderin taǵaıyndaý kezinde eńbek ótilin taný jáne esepke jatqyzý bóliginde basqa eldiń aýmaǵyna kóshý kezinde Qazaqstan Respýblıkasy men Mońǵolııa azamattary úshin qosymsha múmkindikter beredi. Atap aıtqanda:
— ortaq jáne bazalyq zeınetaqylardy esepteý kezinde eńbek ótilin esepke alý maqsatynda;
— Qazaqstan Respýblıkasynyń zeınetaqy júıesi aıasynda qalyptastyrylatyn jınaqtaýshy zeınetaqylardy eksporttaý kezinde.
Ataýly Kelisim kelesi zeınetaqylarǵa:
— Qazaqstan Respýblıkasynda — eńbek sińirgen jyldary úshin zeınetaqy tólemderine;
— Mońǵolııada — áskerı qyzmeti úshin zeınetaqylarǵa qoldanylmaıdy.
Osy memleketterdiń azamattaryna zeınetaqy taǵaıyndaý jáne tóleý turatyn memleketiniń zańnamasy boıynsha júzege asyrylady.
— Zańdy iske asyrý halyqaralyq yntymaqtastyqty odan ári damytýǵa, azamattardyń áleýmettik kepildikteri men quqyqtaryn nyǵaıtýǵa, sondaı-aq eki memleket arasyndaǵy ózara senimdi kúsheıtýge yqpal etetin bolady. Qujatta adamnyń jáne azamattyń Qazaqstan Respýblıkasynyń Konstıtýtsııasy men zańdarynda kepildik berilgen quqyqtary men bostandyqtaryn shekteıtin normalar qamtylmaıdy, — delingen Májilis komıtetiniń qoryndy aqparatynda.
Eske salsaq, byltyr qazan aıynda Qazaqstan men Mońǵolııa prezıdentteri birlesken deklaratsııaǵa qol qoıdy.
Aıta keteıik, 2025 jyly 13 202 etnıkalyq qazaq qandas mártebesin aldy. Jyl basynan Qazaqstanǵa kelgen qandastardyń 45,6%-y Ózbekstannan, 42,3% — Qytaıdan, 4,1% — Túrikmenstannan, 2,9% — Monǵolııadan, 2,6% — Reseıden jáne 2,5%-y basqa elderden.