Májilis Qazaqstan men Qytaı arasyndaǵy ınvestıtsııalardy qorǵaý týraly zań qabyldady

Atalǵan Kelisimge 2025 jylǵy 16 maýsymda QHR Tóraǵasy Sı Tszınpınniń Astana qalasyna sapary barysynda qol qoıyldy.

- Bul Kelisim Qazaqstan men Qytaı arasyndaǵy 1992 jylǵy 10 tamyzdaǵy qoldanystaǵy halyqaralyq shartty ózektendirip, eki memlekettiń arasyndaǵy ınvestıtsııalyq múmkindikterdi keńeıtedi, neǵurlym jetildirilgen qorǵaý tetikteri men kepildekterdi usynady, sonymen qatar ekijaqty yntymaqtastyqty jańa deńgeıge kóteredi. Halyqaralyq shart ınvestorlarǵa quqyqtyq kepildikter berip qana qoımaı, ınvestıtsııalyq qyzmetti júzege asyrý úshin ashyq jáne boljamdy jaǵdaılardy qamtamasyz etedi. Ol eksproprıatsııadan qorǵaý, halyqaralyq arbıtrajǵa qol jetkizý, ınvestorlarǵa ádil ári teń quqyly kózqaras boıynsha erejelerdi bekitedi, - dedi QR Syrtqy ister mınıstriniń orynbasary Álibek Qýantyrov.

Onyń aıtýynsha, eki el arasyndaǵy qatynastar jan-jaqty strategııalyq áriptestik deńgeıine jetti.

2025 jyly Qytaıdan tartylǵan tikeleı sheteldik ınvestıtsııa kólemi 2,8 mlrd AQSh dollaryn qurady, bul onyń aldyndaǵy jyldyń sáıkes kezeńimen salystyrǵanda 2,4 ese joǵary (2024 jyly – 1191,5 mln AQSh dollary).

- 2005 jyldan bastap 2025 jylǵa deıin Qytaıdan tartylǵan ınvestıtsııanyń jalpy kólemi 29,3 mlrd AQSh dollaryn qurady. 2025 jylǵy qańtar – jeltoqsan aralyǵynda ekijaqty taýar aınalymy 34,1 mlrd AQSh dollaryn qurady (eksport – 15,2 mlrd AQSh dollary, ımport – 18,9 mlrd AQSh dollary), bul onyń aldyndaǵy jyldyń sáıkes kezeńimen salystyrǵanda 13,2%-ǵa joǵary. Kelisim elder arasyndaǵy ózara tıimdi áriptestikti odan ári nyǵaıtýǵa baǵyttalǵan. Kelisimdi iske asyrý teris áleýmettik-ekonomıkalyq saldarǵa ákep soqpaıdy, sondaı-aq respýblıkalyq bıýdjetten qosymsha shyǵyndaryn talap etpeıdi, - dedi mınıstrdiń orynbasary.

Budan buryn habarlanǵandaı, Qazaqstan men Qytaı zııankesterge qarsy birlesken monıtorıng júrgizedi.