Májilis Qazaqstan men Qyrǵyzstan taýar aınalymyn arttyratyn zańdy qabyldady
ASTANA. KAZINFORM – Búgin Májilistiń jalpy otyrysynda «Qazaqstan Úkimeti men Qyrǵyzstan Mınıstrler kabıneti arasyndaǵy «Qarasý» men «Aq-tilek» avtojol ótkizý pýnktteri aýdanyndaǵy ındýstrııalyq saýda-logıstıkalyq keshenniń qyzmetin qurý jáne retteý týraly kelisimdi ratıfıkatsııalaý týraly» Zańy qabyldandy.
«Qyrǵyz Respýblıkasynyń Prezıdenti S. Japarovtyń Qazaqstanǵa sapary, sondaı-aq Qazaqstan men Qyrǵyzstannyń Joǵary Memleketaralyq Keńesiniń 6-shy otyrysynyń qorytyndysy boıynsha eki memleket basshylary taýar aınalymyn 2030 jylǵa deıin 3 mlrd AQSh dollaryna deıin jetkizýge, onyń ishinde eki eldiń shekaralas aýmaǵynda ındýstrııalyq saýda-logıstıkalyq keshen qurý jáne onyń jumys isteýi esebinen ulǵaıtýǵa ýaǵdalasty. 2023 jyldyń 9 maýsymda Astana qalasynda keshendi qurý jáne onyń qyzmetin retteý týraly úkimetaralyq kelisimge qol qoıyldy. Keshen «Qarasý» jáne «Aq-Tilek» avtojol ótkizý pýnktteri janynda ornalasady», - dedi Saýda jáne ıntegratsııa vıtse-mınıstri Qaırat Tórebaev.
Keshen óndiristik alańdardan, taýarlar men jabdyqtardy saqtaýǵa arnalǵan qoımalardan, sondaı-aq kólik ınfraqurylymynan turady. Keshendi sút, et, kókónis, toqyma, farmatsevtıka jáne taǵy basqa ónimderin óndirý sııaqty kooperatsııalyq jobalardy iske asyrý úshin jaǵdaılar jasalady.
«Sondaı-aq keshendi qurý Qyrǵyz Respýblıkasymen saýda-logıstıkalyq ınfraqurylymdy damytýǵa baǵyttalǵan. Bıylǵy 28 naýryzda Jambyl oblysynyń ákimdigi ınvestordy irikteý boıynsha konkýrs jarııalady. 19 sáýir kúni konkýrstyń ekinshi kezeńi jarııalandy. Alaıda, ótinimderdiń bolmaýyna baılanysty ınvestor iriktelmedi. Osy jyly mamyr aıynda qaıta konkýrs jarııalanady. Keshendi salýdan basqa, áleýetti ınvestordyń aldyna ınjenerlik ınfraqurylymdy (gazben jabdyqtaý, elektrmen jabdyqtaý, sýmen jabdyqtaý, kanalızatsııa, telekommýnıkatsııa, qorshaý, abattandyrý) júrgizý boıynsha jaǵdaılar qoıylǵan. Atalǵan nysandy salý boıynsha odan ári jumysty jergilikti atqarýshy organ ınvestormen birlesip atqarady. Kelisimdi ratıfıkatsııalaý óńir ekonomıkasynyń damýyna jáne Qazaqstan men Qyrǵyzstan arasyndaǵy saýda jáne ekonomıkalyq baılanystardy nyǵaıtýǵa qolaıly áser etedi», - dedi vıtse-mınıstr.
