Májilis Qazaqstan ekonomıkasyna eleýli úles qosatyn qujatty qabyldady
ASTANA. KAZINFORM – Búgin Májilistiń jalpy otyrysynda «2009 jylǵy 9 maýsymdaǵy Eýrazııalyq turaqtandyrý jáne damý qoryn qurý týraly shartqa ózgerister engizý týraly hattamany ratıfıkatsııalaý týraly» Zań qabyldandy.
QR Qarjy vıtse-mınıstri Dáýren Keńbeıildiń aıtýynsha, Eýrazııalyq turaqtandyrý jáne damý qory 6 memleket tarapynan 2009 jyly daǵdarysqa qarsy aımaqtyq mehanızm retinde quryldy.
Qazaqstan men Reseı - bul qordyń donorlary. Qordyń negizgi mindeti – bıýdjetti qoldaýǵa jáne bazalyq ınfraqurylymdy damytý jónindegi iri memlekettik jobalar men áleýmettik sektorǵa turaqtandyrýshy qarjylandyrýdy qamtamasyz etý.
- Jınaqtalǵan tájirıbe men álemdik ekonomıkalyq saıasattaǵy ózgeristerdi eskere otyryp, qordyń qyzmetin qaıta qaraý qajet. Hattamaǵa sáıkes, kelesideı túzetýler engizilip otyr. Olar: qordy tolyqqandy derbes halyqaralyq uıymǵa aınaldyrý, qordyń shtab-páterin Astana qalasynda ashý, jobalar men baǵdarlamalardy qarjylandyrý úshin ulttyq valıýtalardy paıdalaný, tehnıkalyq kómekti usyný, qorda daýys berý prıntsıpin anyqtaý. Bul turǵyda qordy tolyqqandy derbes halyqaralyq uıymǵa aınaldyrý qordyń jumysyn jandandyrýǵa múmkindik beredi. Jańa mártebeni alý arqyly qordyń qyzmeti Qazaqstannyń ekonomıkasyna da eleýli úles qosady degen senimdemiz, - dedi D. Keńbeıil.
Budan buryn habarlanǵandaı, búgin Májilis depýtattary «Jasandy ıntellekt týraly» negizgi zań men eki ilespe zańnyń jobalaryn birinshi oqylymda maquldady.