Májilis qazaqy jylqyny saqtaý jáne kóbeıtý týraly zańdy qabyldady
ASTANA. KAZINFORM – Búgin Májilistiń jalpy otyrysynda jylqylardyń qazaqy tuqymyn saqtaý jáne ósimin kóbeıtý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zań jobasy qaralyp, qabyldandy.
«Zań jobasy Parlamenttiń bir top depýtattarynyń bastamashylyǵymen ázirlengen. Jobanyń maqsaty – memlekettik qoldaý kórsetý arqyly otandyq sport baǵytyndaǵy jylqy tuqymynqalpyna keltirý jáne asyl tuqymdyq qasıetterin jaqsartý. Qostanaı tuqymy 70 jylǵa sozylǵan ǵylymı zertteýdiń nátıjesinde shyǵarylǵan, mamandandyrylǵan sporttyq baǵyttaǵy jáne ulttyq at sporty túrlerin damytý úshin keńinen qoldanylatyn qazaqtyń shabandoz tuqymy, halyqtyń ulttyq qazynasy», - dedi Aıdarbek Qojanazarov zań jobasyna engiziletin ózgerister týraly aıta kele.
Onyń málimetinshe, 1969 jyly elimizde 44 myńnan astam Qostanaı jylqy tuqymy tirkelgen, bul barlyq asyl tuqymdy jylqylardyń 9,7 %. Búginde Qostanaı jylqy tuqymynyń resmı tirkelgen sany 270 bastan aspaıdy eken, al Adaı jylqysynyń 1300 basy qalǵan.
«Eger sporttyq maqsatta paıdalanylatyn otandyq jylqy tuqymdaryn saqtaý men kóbeıtý boıynsha bir qujat qabyldamasaq, babalarymyzdyń, ǵalymdarymyzdyń kópjyldyq eńbegi dalaǵa ketýdiń az-aq aldynda tur. 2014 jyly tuqymdy damytýǵa baǵyttalǵan memlekettik qoldaý toqtatylǵannan keıin Qostanaı jylqylarynyń sany kúrt azaıyp, joıylý aldynda tur. Bul jaǵdaı ulttyq at sporty túrlerin damytýdyń negizgi tejeýshi faktorlardyń biri. Osyǵan baılanysty Parlament depýtattary otandyq jylqy tuqymyn saqtaý men ósimin molaıtýǵa baǵyttalǵan zań jobasyn ázirleý týraly sheshim qabyldady», - deıdi ol.
Atalǵan zań jobasy arqyly «Asyl tuqymdy mal sharýashylyǵy týraly» jáne «Selektsııalyq jetistikterdi qorǵaý týraly» Qazaqstan Respýblıkasynyń Zańdaryna túzetýler engizilmek.
Zańnamalyq túzetýlerde qostanaılyq jylqy tuqymyn saqtaýǵa jáne ósimin molaıtýǵa baǵyttalǵan kelesi is-sharalardy sýbsıdııalaý kózdelgen:
- asyl tuqymdy ortalyqtardyń sheteldik selektsııanyń sporttyq baǵytyndaǵy asyl tuqymdy aıǵyrlardy satyp alý;
- asyl tuqymdy analyq mal basymen selektsııalyq-asyl tuqymdyq jumys júrgizý;
- olardy ustaý boıynsha shyǵyndardy óteý.
«Atalǵan qoldaý tetikteri, otandyq sporttyq baǵyttaǵy jylqy tuqymdaryn damytýǵa jaǵdaı jasap, báıge, kókpar, aýdaryspaq, jamby atý, teńge alý syndy ulttyq at sporty túrlerin buqaralyq damytýǵa yqpalyn tıgizedi. Qazaq «jylqy – maldyń patshasy, túıe maldyń qasqasy», dep beker aıtpaǵan. Eger rasymen de elimizden Qabirhan sekildi myqty jylqylardyń úlken arenalarda top jarýyn qalasaq, osy zańdy qoldaýlaryńyzdy suraımyn», - dedi A. Qojanazarov.
