Májilis Qatarmen arada quqyqtyq kómek máselesine qatysty zań qabyldady
ASTANA. KAZINFORM — Búgin Májilistiń jalpy otyrysynda Qazaqstan men Qatar arasynda quqyqtyq máselelerge qatysty eki qujat qabyldandy.
Birinshisi – «Qazaqstan Respýblıkasy men Qatar Memleketi arasyndaǵy qylmystyq ister boıynsha ózara quqyqtyq kómek týraly kelisimdi ratıfıkatsııalaý týraly» Zańy. Bul kelisimge 2024 jylǵy 14 aqpanda Dohada qol qoıyldy.
QR Bas prokýrorynyń orynbasary Ǵalymjan Qoıgeldıevtiń aıtýynsha, kelisim kúdiktiler men aıyptalýshylardyń kinásin dáleldeý úshin tıisti is-áreketterdi qamtyp otyr.
- Máselen, qamaýdaǵy adamdardy ýaqytsha berý, tintý, banktegi shottardy anyqtaý, qajet saraptamalyq jumystardy júzege asyrý eskerilgen. Bul is-qımyldardy júrgizý tetigi Qazaqstannyń Qylmystyq-protsestik kodeksinde rettelgen. Eger mundaı áreketter Qatar memleketinde oryn alsa, onda aldyn ala ýaǵdalastyqqa sáıkes, bizdiń quqyq qorǵaý organdarynyń qyzmetkerleri osy is-sharalarǵa tolyqqandy qatysa alady. Sonymen qatar, quqyqtyq qyzmet kórsetýden bas tartý negizderi de kórsetilgen... Osyndaı kelisim qazir 31 memleketpen qoıyldy, - dedi ol.
Budan bólek qabyldanǵa ekinshi qujat - «Qazaqstan Respýblıkasy men Qatar memleketi arasyndaǵy ustap berý týraly kelisimdi ratıfıkatsııalaý týraly» Zańy. Kelisimge 2024 jylǵy 14 aqpanda Dohada qol qoıylǵan.
Ǵ. Qoıgeldıevtiń sózine qaraǵanda, osy qujattyń maqsaty – qylmys jasap, Qatarda jasyrynyp júrgen adamdy Qazaqstanǵa alyp kelý.
Kelisim ekstradıtsııalaýdy jáne odan bas tartýdy júzege asyrýǵa arnalǵan negizderdi aıqyndaıdy, sondaı-aq ustap berý sharttary men rásimderi, ustap berýdi keıinge qaldyrý jáne ýaqytsha ustap berý týraly erejelerdi qamtıdy. Taraptardyń óz azamattaryn ustap berýi kózdelmeıdi. Іzdeýde júrgen adamdardy aldyn ala qamaýǵa alý tártibi, sondaı-aq qylmys nátıjesinde alynǵan nemese dálel bola alatyn zattar men qujattardy alý jáne berý máseleleri reglamenttelgen. Kelisimdi ratıfıkatsııalaý Taraptardyń quzyretti organdary arasyndaǵy yntymaqtastyqty kúsheıtýge jáne jazanyń bultartpastyǵy qaǵıdatyn qamtamasyz etýdiń tıimdiligin arttyrýǵa múmkindik beredi.
Buǵan deıin habarlanǵandaı, búgin Májilistiń jalpy otyrysynda «Qazaqstan Úkimeti men Reseı Úkimeti arasyndaǵy QR men RF-nyń birtutas energetıkalyq júıeleriniń qatar jumys isteýin qamtamasyz etý jónindegi sharalar týraly kelisimdi ratıfıkatsııalaý týraly» QR Zańy qabyldandy.