Májilis Qarjylyq monıtorıng agenttiginiń ókiletin keńeıtetin zań jobasyn maquldady

ASTANA. KAZINFORM – Májilis zańnamaǵa qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa tosqaýyldardy jetildirýge arnalǵan zań jobasyn birinshi oqylymda maquldady.

Bul zań jobasy Qarjylyq monıtorıng agenttiginiń ókilet aıasyn keńeıtip, kommertsııalyq emes uıymdardyń kúdikti operatsııalaryn taldap, monıtorıng júrgizýge mindetteıdi. 

— Budan basqa uıaly baılanys operatorlary men Azamattarǵa arnalǵan úkimet qarjylyq monıtorıngtiń jańa sýbektileri bolady. Uıaly baılanys operatorlary mobıldi teńgerimdi tolyqtyrý týraly, al Azamattarǵa arnalǵan úkimet notarıýstardaǵy mámilelerge uqsas jyljymaıtyn múlik pen 50 mln teńgeden astam somaǵa jasalatyn mámileler týraly aqparat beretin bolady. Bul normalar kúdikti operatsııalardy tıimdirek anyqtap, jolyn kesýge yqpal etedi, — dedi agenttik tóraǵasynyń orynbasary Jeńis Elemesov.

Bul qujat quny 5 mln teńgeden asatyn tsıfrlyq aktıvter operatsııalarynyń bárin Qarjylyq monıtorıng agenttiginiń baqylaýyna berýdi kózdeıdi.

— Mádenı qundylyqtardy qolma-qol aqsha nysanynda satyp alý (satý), mádenı qundylyqtardy Qazaqstanǵa ákelý ne Qazaqstannan áketý jónindegi operatsııalardyń shegin 45 mln teńgeden 1 mln teńgege deıin tómendetý usynylady, — dedi Jeńis Elemesov.

Qujatty talqylaý kezinde Qarjylyq monıtorıng agenttigi tóraǵasynyń orynbasary qazaqstandyqtardyń 15 mlrd dollardyń krıptoaktıvin kóleńkeli aımaqtan satyp alǵany týraly málimetke pikir bildirdi. 

Sondaı-aq, depýtat Baqytjan Bazarbek Astana Hub, «Qazaqstan halqyna» qoǵamdyq qory, «Jasyl damý» aktsıonerlik qoǵamy sııaqty mekemelerdi de zańsyz aktıvterdi jylystatý turǵysynan qarjylyq monıtorıng aıasyna alýda talap etti. 

Eske salsaq, Májilis aqpan aıynda ǵana aqshany jylystatýǵa qarsy kúres týraly zań qabyldaǵan bolatyn.