Májilis qaraýyna bank qyzmeti týraly zań jobasy engizildi
ASTANA. KAZINFORM — «Qazaqstan Respýblıkasyndaǵy bankter jáne bank qyzmeti týraly» zań jobasy Májilistiń qaraýyna ótti.
— Zań jobasy Memleket basshysynyń qarjy sektoryn odan ári damytý jónindegi tapsyrmasyn iske asyrý maqsatynda ázirlendi. Búkil bank sektory úshin biryńǵaı ári tıimdi negiz qurýǵa múmkindik beredi. Bankterge qadaǵalaý kúsheıtilip, olardy ashý jáne lıtsenzııalaý tártibine qoıylatyn talaptar ózgeredi. Negizgi bastamanyń biri — bazalyq banktik lıtsenzııany engizý. Bul jańa bankterdiń naryqqa kirý shartyn jeńildetip, básekelestikti arttyrady, sondaı-aq bıznesti nesıeleýge oń áser etedi. Sonymen qatar, qarjy uıymdary basshylaryna qoıylatyn standart kúsheıtiledi. Bul basqarý qyzmetine tek kásibı daıarlanǵan jáne adal mamandardyń kelýin qamtamasyz etedi, — dedi Qarjy jáne bıýdjet komıtetiniń tóraǵasy Tatıana Saveleva Májilistiń jalpy otyrysynda.
Halyq qalaýlysynyń aıtýynsha, jańa zań jobasyndaǵy jańashyldyqtyń biri — tólem qabiletsiz bankterdi retteý tetigin engizý. Problemalyq bankterdiń qarjylyq turaqtylyǵyn qalpyna keltirýdiń jańa tásilderi engiziledi, bul salymshylardyń múddesin qorǵaýǵa jáne qarjy júıesiniń turaqtylyǵyn saqtaýǵa múmkindik beredi.
— Sondaı-aq, bankterdiń enshiles uıymdarynyń qyzmetin retteýdi jetildirý, saqtandyrý, banktik jáne mıkroqarjylyq máseleler boıynsha biryńǵaı qarjylyq ombýdsman ınstıtýtyn qurý, sonymen qatar ıslamdyq bankıngti damytý úshin jaǵdaı jasaý kózdelgen. Budan bólek, ulttyq tsıfrlyq qarjylyq ınfraqurylymdy qurýdyń, tsıfrlyq teńgeni jáne tsıfrlyq aktıvti aınalymǵa engizýdiń quqyqtyq negizderi qalyptastyrylady. Osylaısha, zań jobasy básekege qabiletti, tıimdi banktik jáne qarjylyq naryqty qurý men damytýǵa, qyzmet sapasyn arttyrýǵa jáne azamattarymyzdyń quqyqtaǵyn qorǵaýǵa baǵyttalǵan, — deıdi komıtet basshysy.
Aıta ketsek, Memleket basshysy bıyl Qazaqstan halqyna Joldaýynda bankter týraly zań qabyldaý mańyzdy qadam ekenin basa aıtty. Prezıdenttiń aıtýynsha, bankter naqty sektorǵa belsendi túrde qarjy salýy kerek.