Májilis Ystyqkóldegi Qazaqstan menshigindegi 4 sanatorııge qatysty qujatty qabyldady
ASTANA. KAZINFORM — Búgin Májilistiń jalpy otyrysynda 2006 jylǵy 4 shildedegi Qazaqstan Úkimeti men Qyrǵyzstan Úkimeti arasyndaǵy Qyrǵyz Respýblıkasy Ystyqkól oblysynyń aýmaǵynda ornalasqan kýrorttyq-rekreatsııalyq sharýashylyq obektilerine Qazaqstannyń menshik quqyqtaryn retteý týraly kelisimge ózgerister engizý týraly hattamany ratıfıkatsııalaý týraly zańy qabyldandy.
Sonymen qatar, palata depýtattary 2009 jylǵy 1 jeltoqsandaǵy Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy Qyrǵyz Respýblıkasy Ystyqkól oblysynyń Ystyqkól aýdanyndaǵy jer ýchaskelerin jalǵa berý týraly shartqa ózgerister men tolyqtyrýlar engizý týraly hattamany ratıfıkatsııalaý týraly zańdy qabyldady.
- Qyrǵyz Respýblıkasynyń Ystyqkól oblysy aýmaǵynda Qazaqstannyń menshigi retinde tanylǵan kelesi 4 sanatorıı jumys istep tur. Olardyń arasynda: Qazaqstan Respýblıkasy Prezıdentiniń Іs basqarmasy qaramaǵyndaǵy «Qazaqstan» sanatorııi, Ǵylym jáne joǵary bilim mınıstrliginiń «Samal» demalys úıi, «Ýnıversıtet» sporttyq-saýyqtyrý lageri, sondaı-aq Týrızm jáne sport mınıstrliginiń «Olımp» demalys bazasy bar, - dedi Qarjy mınıstri Mádı Takıev.
Taraptardyń obektiler boıynsha ózara is-qımyldary, eki eldiń Úkimetter deńgeıinde jasalǵan tómendegi halyqaralyq sharttar aıasynda júzege asyrylady:
– birinshiden, «2006 jylǵy 4 shildedegi Qazaqstan Respýblıkasynyń menshik quqyqtaryn retteý týraly» Kelisim.
– ekinshiden, «2009 jylǵy 1 jeltoqsandaǵy jer ýchaskelerin jalǵa berý týraly» Shart.
Bul Kelisim jáne Shart Qazaqstan Respýblıkasynyń Úkimeti qaýlysymen bekitilgen. Eki jaqty qatynastardyń ózekti máseleleriniń biri – 4 kýrorttyq-sanatorlyq keshenge qatysty halyqaralyq sharttar boıynsha qazaqstandyq taraptyń mindettemelerdi oryndaýy.
- Kelisimshartqa sáıkes, bizdiń tarap bul nysandardy múmkindiginshe jyl boıy jumys isteıtin 3 nemese 4 juldyzdy qonaqúıler deńgeıine jetkizý sharalaryn qabyldaýy tıis edi. Biraq kelisim talaptary oryndalmady. Bul rette, kelisimde merzimdi uzartý kózdelmegen. Sonymen qatar 2022 jyly eki eldiń úkimetteri qazaqstandyq taraptyń mindettemelerdi oryndaý merzimderin uzartý jáne ınvestorlar tartý múmkindigi týraly kelisimge qol jetkizdi. Kezdesý qorytyndysy boıynsha hattama jobalaryna «Qazaqstan» sanatorııine 4 juldyzdy qonaqúı deńgeıine, al «Ýnıversıtet» lageri men «Samal» demalys úıin 3 juldyzdy qońaqúı deńgeıine jetkizý, «Olımp» demalys bazasynda sportshylar úshin rekonstrýktsııalaý jumystaryn júrgizý boıynsha mindettemelerdi belgileýge kelisti. Sondaı-aq hattamalardyń kúshine enýi úshin qajetti memleketishilik rásimderdi oryndaý týraly Taraptar sońǵy habarlamalardy alǵan kúnnen bastap bes jyl ishinde mindettemelerdi iske asyrý merzimi belgilendi, - dedi mınıstr.
2024 jylǵy 4 jeltoqsanda eki eldiń Úkimetteri Kelisimge jáne Shartqa túzetýler engizý týraly hattamalarǵa qol qoıdy. «Qazaqstan Respýblıkasynyń halyqaralyq sharttary týraly» Zańnyń talabyna sáıkes Kelisim men Shart jáne olarǵa Hattamalar ratıfıkatsııalaýǵa jatady.
Buǵan deıin habarlanǵandaı, Qyrǵyzstanda Ystyqkóldi Almatymen baılanystyratyn jol ashyldy.