Májilis HVQ-men aradaǵy memorandýmdy ratıfıkatsııalady
ASTANA. KAZINFORM – Búgin Májilistiń jalpy otyrysynda «Qazaqstan Respýblıkasy men Halyqaralyq valıýta qory arasyndaǵy Kavkaz, Ortalyq Azııa jáne Mońǵolııa úshin áleýetti damytýdyń óńirlik ortalyǵyna qatysty ózara túsinistik jónindegi memorandýmdy ratıfıkatsııalaý týraly» Zań qabyldandy.
Qujat boıynsha negizgi baıandama jasaǵan Ulttyq bank tóraǵasy Tımýr Súleımenovtiń aıtýynsha, memorandýmnyń erejeleri ortalyqtyń Almaty qalasyndaǵy keńsesiniń jumys isteýi men ornalasýy, sondaı-aq ortalyq qyzmetkerleriniń Qazaqstanda bolý sharttaryn reglamentteıdi.
Atap aıtqanda:
- Ortalyqtyń qurylymy jáne shtattyq quramy;
- Ortalyqtyń basqarý organdary;
- Ortalyqtyń oqý baǵdarlamalaryna qatysý tártibi;
- Ortalyq pen onyń qyzmetkerlerine beriletin ımmýnıtetter men artyqshylyqtar.
- Bul – Qazaqstandaǵy halyqaralyq uıymdardyń qyzmeti týraly kelisimderge arnalǵan standartty erejeler jıyntyǵy. Halyqaralyq valıýta qorynyń ortalyǵynyń Qazaqstanda ornalasýy eldiń áleýmettik-ekonomıkalyq damýyna yqpal etip, ekonomıkalyq saıasat pen memlekettik basqarý salasyndaǵy ulttyq ınstıtýtsıonaldyq áleýetti nyǵaıtýǵa múmkindik beredi. Qazaqstan úshin HVQ ortalyǵy – konsýltatsııalar, kásibı bilim berý jáne ekonomıkalyq semınarlar alańy ǵana emes, sonymen qatar strategııalyq resýrs. Búginde ortalyq 100 mıllıonǵa jýyq halqy bar 9 eldi biriktiredi jáne HVQ-nyń jahandyq jelisiniń bir bóligi sanalady, - dedi ol.
Onyń aıtýynsha, búginde ortalyq jumysyn bastap ketti. 615-ten astam is-shara ótkizildi. Búkil óńirden 4 670 maman, onyń ishinde Qazaqstannan 1370 maman oqýdan ótti. Ulttyq banktiń bastamasymen Qazaqstannyń memlekettik organdary úshin arnaıy semınarlar ótkizý jumysy aıtarlyqtaı kúsheıdi. Atap aıtqanda, makroekonomıkalyq taldaý jáne makrofıskaldyq saıasat, sondaı-aq ekonomıkalyq ósý men turaqtylyq boıynsha trenıngter men semınarlar ótkizildi.
- Jahandyq belgisizdik jaǵdaıynda ulttyq ekonomıkanyń ornyqtylyǵy memlekettik ınstıtýttardyń tıimdiligimen jáne adamı kapıtal sapasymen qamtamasyz etiledi. Osy turǵyda ortalyqtyń qyzmeti – eldiń qarjy júıesiniń ınstıtýtsıonaldyq jetilýine tikeleı ınvestıtsııa sanalady. Memorandýmdy ratıfıkatsııalaý ortalyqtyń tolyqqandy jumys isteýi úshin qajetti quqyqtyq negizdi qalyptastyrady. Ol ekonomıka jáne qarjy máseleleri boıynsha Qazaqstannyń óńirdegi kóshbasshy pozıtsııasyn júıeli túrde arttyrady, - dedi Tımýr Súleımenov.
Buǵan deıin HVQ-nyń Almaty ortalyǵy Qazaqstanǵa qandaı paıda ákeletinin jazǵan edik.