Májilis Frantsııada zańsyz júrgen azamattarymyzdy sanktsııasyz qaıtarýǵa múmkindik beretin qujatty qaraıdy
ASTANA. KAZINFORM — Búgin Májilistiń jalpy otyrysynda palatanyń beıindi komıtetteri birqatar zań jobasyn qorytyndy ázirleýge alady. Sondaı-aq depýtattar kún tártibine shyǵarylǵan zań jobalaryn talqyǵa salady.
Palata aldymen Qazaqstan men Frantsýz úkimetteri arasyndaǵy adamdardy readmıssııalaý týraly kelisimdi ratıfıkatsııalaý týraly zań jobasyn qaraıdy. Bul kelisim Frantsııada zańsyz júrgen, jeke basyn kýálandyratyn qujattary joq Qazaqstan azamattaryn sanktsııasyz, ıaǵnı ákimshilik aıyppul tóletip qana qaıtarýǵa múmkindik beredi. Eki eldiń ýákiletti organdary azamattardyń elderine oralýy úshin qujattardy resimdeýge kómek kórsetetin bolady. Atalǵan kelisim Memleket basshysynyń 2024 jyly Frantsııaǵa sapary barysynda qol qoıylǵan. Kelisimniń kúshine enýi kóshi-qon protsesin baqylaýdy kúsheıtip, eki eldiń yntymaqtastyǵyn nyǵaıtýǵa yqpal etedi.
Sonymen qatar depýtattar Qazaqstan Úkimeti men Bilim, ǵylym jáne mádenıet máseleleri jónindegi Birikken Ulttar Uıymy (ıÝNESKO) arasyndaǵy Qazaqstanda ıÝNESKO aıasyndaǵy 2-sanatty ortalyq retinde Ortalyq Azııa óńirlik glıatsıologııa ortalyǵynyń mártebesin qaıta jalǵastyrý týraly kelisimdi ratıfıkatsııalaý týraly zań jobasyn qaraıdy.
Kelisim muzdyqtardy, qar jamylǵysyn jáne máńgi tońdy zertteý, sondaı-aq klımattyń ózgerýi jaǵdaıynda olardyń aımaqtaǵy sý resýrstaryna áserin baǵalaý salasynda halyqaralyq ǵylymı yntymaqtastyqty odan ári damytýǵa baǵyttalǵan.
Esterińizge sala ketsek, bıyl maýsymda ıÝNESKO qamqorlyǵyndaǵy 2-sanattaǵy Ortalyq Azııa óńirlik glıatsıologııa ortalyǵynyń (OAÓGO) dırektory Takır Balyqbaev Parıjdegi ıÝNESKO shtab-páterine jumys saparymen bardy. Sapardyń basty nátıjesi ıÝNESKO men OAÓGO arasynda Ortalyqtyń ıÝNESKO qamqorlyǵyndaǵy 2-sanattaǵy ınstıtýt mártebesin uzartý týraly ózara túsinistik jónindegi memorandýmǵa qol qoıylýy boldy. Qujat taraptardyń muzdyqtarǵa keshendi zertteýler men sý resýrstaryn sapaly basqarý salasyndaǵy seriktestikti odan ári nyǵaıtýǵa daıyndyǵyn rastaıdy.
Palata Qylmystyq kodekske jáne Qylmystyq-protsestik kodekske tolyqtyrýlar engizý týraly zań jobasyn ekinshi oqylymda qaraıdy. Qujat medıtsınalyq qyzmetkerler men jedel járdem júrgizýshilerine olarǵa qyzmettik mindetin atqarý kezinde kúsh qoldanǵany jáne qatygezdik kórsetkeni úshin jaýapkershilikti kúsheıtýge baǵyttalǵan. Osy jyldyń qarashasynda 1-oqylymda maquldanǵan zań jobasyna sáıkes, Qylmystyq kodekske jańa 380-3-baby engiziledi. Ol «medıtsına qyzmetkeri» jáne «jedel medıtsınalyq járdem júrgizýshisi» degen arnaıy sýbektini belgileıdi.
Esterińizge sala ketsek, ótken aptadaǵy jalpy otyrysta depýtattar Salyq kodeksine kommýnaldyq menshiktegi energııa óndirýshi uıymdarǵa salyq salý máseleleri boıynsha tolyqtyrýlar engizý týraly, sondaı-aq kúzet qyzmeti týraly zańdardy ekinshi oqylymda qabyldap, Mońǵolııamen zeınetaqy salasyndaǵy yntymaqtastyq týraly úkimetaralyq kelisimdi ratıfıkatsııalaǵan bolatyn. Májilis qabyldaǵan birinshi Zań memleket kórsetetin kómek aıasynda memlekettik sýbsıdııalar men granttardy, basqa da óteýsiz kómekti alýshy — kommýnaldyq menshiktegi jáne bir mezgilde elektr energııasyn, sýdy (dıstıllıatty), jylý energııasyn óndirý jónindegi qyzmetti júzege asyratyn energııa óndirýshi uıymnyń memlekettik sýbsıdııalardy tolyq ıgerýi maqsatynda ázirledi. Bul qujat aıasyndaǵy jeńildikter Mańǵystaý atom energetıkalyq kombınatyna (MAEK) qatysty.
Al ekinshi qabyldanǵan zańdy Májilis depýtattary kúzet qyzmeti salasynda memlekettik baqylaýdy júzege asyrý tártibin jetildirý jáne qarý ıeleri men kúzet qyzmetin júzege asyratyn uıymdarǵa qoıylatyn talaptardy kúsheıtý maqsatynda ázirlegen.
— Qujatta kúzet qyzmeti sýbektileriniń quqyqtary men qarý aınalymy jáne Memlekettik oq-gılza qoımasyn qalyptastyrý salasyndaǵy zańnamanyń talaptary naqtylanady, sondaı-aq azamattyq jáne qyzmettik oıyq uńǵyly atys qarýyn baqylaý maqsatynda atysty ýaqtyly júrgizý jónindegi mindetteme engiziledi, — dedi qujat boıynsha negizgi baıandama jasaǵan Májilis depýtaty Magerram Magerramov.
Májilis ratıfıkatsııalaǵan kelesi qujat — 2024 jylǵy 29 qazanda Ulan-Batyr qalasynda qol qoıylǵan Qazaqstan Úkimeti men Mońǵolııa Úkimeti arasyndaǵy zeınetaqy salasyndaǵy yntymaqtastyq týraly kelisim.
Qujat zeınetaqy tólemderin taǵaıyndaý kezinde eńbek ótilin taný jáne esepke jatqyzý bóliginde basqa eldiń aýmaǵyna kóshý kezinde Qazaqstan Respýblıkasy men Mońǵolııa azamattary úshin qosymsha múmkindikter beredi. Atap aıtqanda:
— ortaq jáne bazalyq zeınetaqylardy esepteý kezinde eńbek ótilin esepke alý maqsatynda;
— Qazaqstan Respýblıkasynyń zeınetaqy júıesi aıasynda qalyptastyrylatyn jınaqtaýshy zeınetaqylardy eksporttaý kezinde.
Ataýly Kelisim kelesi zeınetaqylarǵa:
— Qazaqstan Respýblıkasynda — eńbek sińirgen jyldary úshin zeınetaqy tólemderine;
— Mońǵolııada — áskerı qyzmeti úshin zeınetaqylarǵa qoldanylmaıdy.
Osy memleketterdiń azamattaryna zeınetaqy taǵaıyndaý jáne tóleý turatyn memleketiniń zańnamasy boıynsha júzege asyrylady.
Otyrys sońynda depýtattar memlekettik organdarǵa ózekti áleýmettik-ekonomıkalyq máseleler boıynsha 18 depýtattyq saýal joldady. Máselen, Erlan Barlybaev Premer-mınıstr Oljas Bektenovtiń atyna joldaǵan saýalynda eńbek mıgranttaryna qosymsha salyq salý týraly usynysyn aıtty. Edil Jańbyrshın Úkimetke Jaıyq pen Balqashtyń ekojúıesin «Tsıfrlyq egiz» tehnologııasy arqyly baqylaýǵa keńes berdi. Janarbek Áshimjan Básekelestikti qorǵaý jáne damytý agenttiginen Altel, Tele2, Beeline tarıf saıasatyn tekserýdi surady.
— Taıaýda Qazaqstannyń Altel, Tele2 jáne Beeline kompanııalary uıaly telefonnyń abonent tólemin 20-paıyzǵa ósiretindigin málimdedi. ıAǵnı, atalǵan operatorlar ınternettiń de tarıfin 20-paıyzǵa ósiredi degen sóz. Úsh iri operatordyń tarıfterdi birdeı kólemde, bir ýaqytta qymbattatýy qoǵamda úlken kúmán týdyryp otyr. Bul kompanııalar arasyndaǵy básekeniń emes, ózara kelisimniń, úılesimniń, astyrtyn aqyldasýdyń belgisi emes pe, — dedi depýtat.