Májilis esirtkige qarsy is-qımyl týraly zańdy qabyldady
ASTANA. KAZINFORM – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine esirtki, psıhotroptyq zattardyń jáne olardyń prekýrsorlarynyń zańsyz aınalymyna qarsy is-qımyl máseleleri boıynsha ózgerister men tolyqtyrýlar engizý týraly» ekinshi oqylymda qaralyp, qabyldandy.
Zańnyń negizgi maqsaty - Qazaqstan Respýblıkasynyń esirtki, psıhotroptyq zattardyń jáne olardyń prekýsorlarynyń zańsyz aınalymyna qarsy is-qımyl jónindegi qoldanystaǵy zańnamasyn jetildirý.
Májilistiń Zańnama jáne sot-quqyqtyq reforma komıtetiniń málimetine qaraǵanda, QR Qylmystyq kodeksine tıisti túzetýler engizildi. Bul rette, esirtki, psıhotroptyq zattardy, sol tektesterdi óndirý men olardy, onyń ishinde «esirtkini jasyryp ketýshilerdi» paıdalanyp ótkizý arasyndaǵy jaýapkershiliktiń arajigin ajyratý eskerilgen. Atap aıtqanda, esirtki, psıhotroptyq zattardy, sol tektesterdi ótkizý úshin zańsyz daıyndaý, qaıta óńdeý, óndirý úshin jaýaptylyqty kózdeıtin QR QK-niń jeke jańa 297-1-baby engizildi. Onda múlki tárkilenip, jıyrma jylǵa deıin nemese ómir boıyna bas bostandyǵynan aıyrý qarastyrylǵan.
Sonymen qatar, QR QK-niń 297-babynda esirtki zattardy ótkizý maqsatynda zańsyz ıemdený, saqtaý, tasymaldaý, jóneltý nemese ótkizý úshin bes jyldan segiz jylǵa deıin bas bostandyǵynan aıyrý (buryn bes jyldan on jylǵa deıin bolǵan) túrinde qylmystyq jaýaptylyq kózdelgen. Іri mólsherde jasalǵan dál sol is-áreketter úshin alty jyldan on jylǵa deıin (buryn alty jyldan on eki jylǵa deıin bolǵan) bas bostandyǵynan aıyrý túrindegi jaza kózdelgen.
Laýazymdy adam qyzmet babyn paıdalanyp jasaǵan dál sol is-áreketter úshin jaýapkershilik kúsheıtiledi.
Qylmystyq-protsestik kodekste QK-niń jeke 297-1-babynyń engizilýine baılanysty bultartpaý sharalaryn qoldaný negizderi men tergeýligin naqtylaıtyn túzetýler qabyldandy.
«Halyq densaýlyǵy jáne densaýlyq saqtaý júıesi týraly» QR Kodeksinde:
- «kúshti áser etetin zattar» uǵymyn;
- esirtkige táýeldiligine baılanysty májbúrlep emdeýden ótken adamdar emhanadan shyǵarylǵannan keıin esepke turýǵa jáne onda demep emdeýden ótýge mindetti ekendigin kózdeıtin túzetýler qabyldandy.
«Esirtki, psıhotroptyq zattar, sol tektester men prekýrsorlar jáne olardyń zańsyz aınalymy men teris paıdalanylýyna qarsy is-qımyl sharalary týraly» Zańda «óndirý» uǵymyn naqtylaýdy kózdeıtin túzetý qabyldandy.
Osyǵan deıin Premer-Mınıstrdiń orynbasary munaı baǵasynyń tómendeý múmkindigine túsinik berdi.
