Aýa raıyna baılanysty bes baǵyt boıynsha poıyzǵa qosymsha oryndar ashyldy
ASTANA. KAZINFORM — Ulttyq tasymaldaýshy aýa raıynyń qolaısyzdyǵyna baılanysty jolaýshylardy tasymaldaý úshin qosymsha oryndar uıymdastyrdy. Bul týraly «Jolaýshylar tasymaly» AQ baspasóz qyzmeti málim etti.
Qolaısyz aýa raıy jaǵdaılaryna jáne birqatar avtomobıl joldarynyń ýaqytsha jabylýyna baılanysty Ulttyq tasymaldaýshy qosymsha kólik qyzmetin uıymdastyrý jóninde jedel sharalar qabyldady. Osyǵan oraı Pavlodar, Ekibastuz, Ereımentaý, Shiderti, Kókshetaý jáne Býrabaı kýrorty baǵyttarynan Astana qalasyna qatynaıtyn poıyzdarda jolaýshylar úshin qosymsha oryndar uıymdastyryldy.
Osylaısha, 2025 jylǵy 16 jeltoqsanda tómendegi poıyzdar arqyly jolaýshylardy otyrǵyzý kózdelgen:
• №7502 «Astana – Pavlodar» (Ereımentaý stantsııasynan otyrǵyzý);
• №139 «Pavlodar – Presnogorkovskaıa» (Ereımentaý stantsııasynan otyrǵyzý);
• №6830 «Kókshetaý – Astana» (Kókshetaý jáne Býrabaı kýrorty stantsııalarynan otyrǵyzý);
• №7508 «Kókshetaý – Astana Nurly jol» (Kókshetaý jáne Býrabaı kýrorty stantsııalarynan otyrǵyzý);
• №045Ts «Pavlodar – Túrkistan» (Ekibastuz jáne Shiderti stantsııalarynan otyrǵyzý).
Ulttyq tasymaldaýshy kólik qoljetimdiligin qamtamasyz etý maqsatynda jedel sharalardy turaqty túrde qabyldap, qolaısyz aýa raıy jaǵdaılarynda jolaýshylar tasymalyn erekshe baqylaýda ustaıdy. Azamattardy jeke qaýipsizdik sharalaryn saqtaýǵa jáne alys saparlardan ýaqytsha bas tartýǵa shaqyramyz.