Májilis erekshe qorǵalatyn tabıǵı aýmaqtarǵa qatysty zańdy qabyldady

ASTANA. KAZINFORM — Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine orman sharýashylyǵy jáne erekshe qorǵalatyn tabıǵı aýmaqtar máseleleri boıynsha ózgerister men tolyqtyrýlar engizý týraly» Zańy ekinshi oqylymda qabyldandy.

- Atalǵan qujatqa Senat Parlamentiniń depýtattary bastamashylyq jasap, osy jyldyń 23 sáýirinde Parlament Májilisi birinshi oqylymda maquldady. Zań orman sharýashylyǵy jáne erekshe qorǵalatyn tabıǵı aýmaqtar salasyndaǵy zańnamany odan ári jetildirý maqsatynda ázirlendi, - dedi Májilis depýtaty Erbolat Satybaldın.

Zań jobasynyń negizgi normalary:

• erekshe strategııalyq mańyzy bar sý sharýashylyǵy qurylysjaılaryn jáne selden, qar kóshkinderinen, kóshkinderden qorǵaý qurylysjaılaryn salý, sondaı-aq olardyń jumys isteýi úshin sýarmaly aýyl sharýashylyǵy alqaptaryn, aýyl sharýashylyǵy, bıologııalyq jáne ırrıgatsııalyq-melıoratsııalyq, balyq sharýashylyǵy beıinindegi ǵylymı-zertteý jáne oqý oryndarynyń tájirıbelik alqaptarynyń jerlerin, orman jáne sý qoryn alyp qoıýǵa ruqsat berýge;
• aýyldy eldi mekenderdiń nemese áleýmettik, ınjenerlik ınfraqurylym obektileriniń jumys isteýin qamtamasyz etý úshin erekshe qorǵalatyn tabıǵı aýmaqtardyń jerlerin aýystyrýǵa;
• qaraýynda erekshe qorǵalatyn tabıǵı aýmaqtar bar memlekettik organdardyń quzyretin belgileý;
• Alakól memlekettik tabıǵı qoryǵynyń arnaıy bólingen ýchaskelerinde jergilikti halyqtyń muqtajy úshin shóp shabý múmkindigi máselesin ýákiletti organnyń belgilegen tártippen sheshýge baǵyttalǵan.

Zań jobasyn ekinshi oqylymǵa daıyndaý barysynda depýtattar kelesideı túzetýler engizdi:

• erekshe qorǵalatyn tabıǵı aýmaqtar qurylǵanǵa nemese keńeıtilgenge deıin salynǵan densaýlyq saqtaý, bilim berý obektileriniń, zırattardyń, tazartý qurylysjaılarynyń, elektr berý jelileriniń jumys isteýi úshin olardyń nysanaly maqsatyn ózgertpeı, erekshe qorǵalatyn tabıǵı aýmaqtardyń jerin aýystyrýǵa ruqsat berý múmkindigin qarastyrý. Bul rette olardyń nysanaly maqsaty ózertilmeıdi;
• erekshe qorǵalatyn tabıǵı aýmaqtarda týrıstik obektilerdiń qyzmetin qamtamasyz etý úshin jol, kópir, baılanys jáne ózge de ınjenerlik ınfraqurylymdy jobalaý, salý jáne paıdalanýdyń tártibin belgileý;
• orman sharýashylyǵy salasynyń mamandaryna shóp shabýǵa jáne mal jaıýǵa jer telimderin berý;
• tabıǵı órtterdi sóndirý úshin janar-jaǵarmaı materıaldary men avıaotyn rezervin qurý. 
• Astana qalasynyń orman saıabaq aımaǵy jerlerin basqarý jáne paıdalaný tártibin belgileý.

- Sonymen birge, Komıtet depýtattary azamattyq qyzmetshilerge jatpaıtyn jáne tabıǵatty qorǵaý men orman qorǵaý qyzmetin júzege asyratyn jumyskerlerdiń eńbegin retteý jónindegi Eńbek kodeksine túzetýler engizdi. Atalǵan zań aıasynda 4 kodekske jáne 8 zańǵa ózgerister men tolyqtyrýlar engiziledi, - dedi depýtat.

Budan buryn habarlanǵandaı, elimizde erekshe qorǵalatyn 6 tabıǵı aýmaq qurylady.