Májilis endaýment qor týraly zań jobasyn maquldady

ASTANA. KAZINFORM — Májilis endaýment qor týraly zań jobasyn birinshi oqylymda maquldady.

Qujatty tanystyrǵan Ǵylym jáne joǵary bilim mınıstri Saıasat Nurbek bul qujat eldegi qaıyrymdylyq mádenıetiniń deńgeıin kóteretinine senimdi.

— Zań jobasynyń taǵy bir maqsaty — qoǵamda qaıyrymdylyq mádenıetin qalyptastyrý. Qazirgi tańda ózimiz kórip otyrmyz, kóptegen qor ashylyp jatyr. Túrli-túrli sebepterge, batyrdyń qurmetine, tanymal tulǵanyń qurmetine, kóshe ataýyn ózgertýge arnalǵan qorlar ashý ádetke aınaldy. Shyn máninde qaıyrymdylyq — jaqsy nárse. Senimdilik, baýyrmaldyq jaǵynan paıdaly. Biraq ony bir júıege keltirý kerek. Endaýment qor týraly zań qoldanysqa engen kezde osyndaı qorlar úshin de ashyq prıntsıpterge negizdelgen, quryltaıshylar men salymshylar aýdıt júrgize alatyn platforma qalyptasady, — dedi Saıasat Nurbek.

Aıtýynsha, qujatta endaýment qor qurýǵa bolatyn salalar belgilendi. 

— Bul — bilim berý, densaýlyq saqtaý, buqaralyq sport jáne mádenıet salalary. Osy salalardan qazirgi tańda bıýdjetke úlken aýyrtpalyq túsip jatyr. Sondyqtan bul zańnyń qabyldanýy bıýdjetke kishkene jeńildik berip, jeke ınvestorlardyń qarajatyn áleýmettik máselelerge baǵyttaýǵa múmkindik ashylar edi, — dedi mınıstr.

Sondaı-aq, ol endaýment qor týraly zańnyń Nazarbaev qorlaryna qatysy joq ekenin atap ótti.

Qujatta endaýment qorǵa salǵan jarnalardy salyqtan bosatý usynylǵan.

Buǵan deıin oqyrman nazaryna atalǵan zań jobasynyń basty jańashyldyqtary týraly suhbat usynǵan edik.