Májilis eń tómengi jalaqyny belgileý týraly zańdy qabyldady

ASTANA. KAZINFORM — Májilis damýshy elderdi erekshe eskere otyryp, eń tómen jalaqyny belgileý týraly konventsııany (131-konventsııa) ratıfıkatsııalaý týraly» Qazaqstan Respýblıkasy zańyn qabylady. 

Osylaısha, Qazaqstan eń tómengi jalaqyny aıqyndaý tásilin halyqaralyq deńgeıde bekitti.

— Qazaqstan 1993 jyldan bastap halyqaralyq eńbek uıymynyń tolyq múshesi jáne atalǵan uıymnyń erejesin saqtaý men halyqaralyq eńbek standarttaryn ulttyq zańnamaǵa kezeń-kezeńimen engizý boıynsha mindetteme aldy. Búginde elimizde eńbek jaǵdaıy, eńbekti qorǵaýdyń jáne áleýmettik dıalogtyń negizgi máselelerin qamtıtyn eńbek salasyndaǵy halyqaralyq uıymnyń 28-i konventsııasyn ratıfıkatsııalady. Osy baǵytta júıeli ári birizdi jumys istep jatyrmyz, — dedi Svetlana Jaqypova Májilistiń jalpy otyrysynda.

Mınıstr 1970 jyly qabyldanǵan jáne búginde halyqaralyq eńbek uıymyna múshe álemniń 54 memleketi ratıfıkatsııalaǵan eń tómengi jalaqyny belgileý týraly 131 konventsııasyn ratıfıkatsııalaýdy usynyp otyr.

Konventsııa kelesi qaǵıdattardy qamtıdy:

— eń tómengi jalaqy júıesin engizý;

— eń tómengi jalaqy belgileý jáne qaıta qaraý kezinde áleýmettik áriptestik tarapynyń qatysýy;

— eń tómengi jalaqyny anyqtaý kezinde ekonomıkalyq faktorlar men qyzmetkerlerdiń qajettiligin esepke alý;

— eńbekaqy tóleý salasyndaǵy kemsitýge tyıym salý;

— Konventsııany ratıfıkatsııalaý týraly sheshim qabyldanǵanǵa deıin ulttyq zańnamany 131 konventsııanyń erejelerine sáıkestendirý boıynsha jumys isteldi. Nátıjesinde 2024 jyly halyqaralyq eńbek uıymynyń usynymdaryn eskere otyryp ázirlengen jalaqynyń eń tómengi mólsherin ádistemesi bekitildi. Atalǵan ádistemege sáıkes, eń tómengi jalaqy medıandyq jalaqymen eńbek ónimdiligi negizinde anyqtalady. Bul tásil belgilengen eń tómengi jalaqy deńgeıin áleýmettik ádilettilik pen ekonomıkalyq negizdiligi arasyndaǵy tepe-teńdikti qamtamasyz etedi. Osylaısha, qoldanystaǵy zańnama № 131 konventsııanyń erejelerine sáıkes keledi, — deıdi ol.

№ 131 konventsııany ratıfıkatsııalaý neni kózdeıdi:

— Qazaqstannyń eń tómengi jalaqyny aıqyndaıtyn qoldanystaǵy tásilin halyqaralyq deńgeıde bekitýge;

— áleýmettik dıalogtyń quqyqtyq bazasyn ásirese, eń tómengi jalaqyny belgileýge taraptardyń qatysýy bóliginde nyǵaıtýǵa;

— Halyqaralyq eńbek uıymyna múshelik sheńberinde Qazaqstannyń halyqaralyq mindettemesine adaldyǵyn rastaýǵa múmkindik beredi.

Bıyl tamyzda belgili bolǵandaı Úkimet eń tómengi jalaqy mólsherin arttyrý ıdeıasynan bas tartty.